Sumqayıt Özəl Türk liseyində sərgi-seminar keçirilib
Yanvarın 24-də Sumqayıt Özəl Türk liseyində görkəmli alim, tanınmış
ekoloq Həsən Əlirza oğlu Əliyevin əziz xatirəsinə həsr olunmuş “Yer
kürəsini tanıyaq, qoruyaq və sevək” mövzusunda sərgi-seminar keçirilib.
Tədbirdə liseyin 7-ci sinif şagirdləri slayd, sərgi və maket
kateqoriyalarında müxtəlif mövzulara həsr olunmuş fərdi işlərini nümayiş
etdiriblər. Liseyin coğrafiya müəllimi Namiq Ağaməmmədov tədbir
iştirakçılarına sərgi- seminarın keçirilməsinin əhəmiyyəti və məqsədi
barəsində geniş məlumat verib. Sonra yer kürəsini qorumaq və öyrənmək bu
planetin sakinlərinin müqəddəs borcudur deyə bildirib.
Tədbir şagird və müəllimlər tərəfindən böyük maraqla izlənilib. Bəzi
şagirdlərin öz işlərini ingilis dilində təqdim etməsi xüsusi ilə
təqdirəlayiq hal kimi qiymətləndirilib. Tədbirdə Sumqayıt şəhər Təhsil
Şöbəsi metodkabinetinin müdiri Sabir Məmmədov və Sumqayıt şəhər Gənclər
və İdman Baş İdarəsinin rəisi Musa Həsənov eləcə də bir qrup ictimaiyyət
nümayəndələri və valideynlər iştirak ediblər. Tədbirdə iştirak edənlər
belə tədbirlərin keçirilməsinin şagirdlərin intellektual səviyyələrinin
artırilmasında, onlarda özünə inamın aşılamasında əhəmiyyətli rol
oynadığını deyiblər. Sumqayıt şəhər Təhsil Şöbəsi metodkabinetinin
müdiri S. Məmmədov bildirib ki, belə tədbirlərin si-silə şəklində
liseydə keçirilməsi burada təlim-tərbiyənin yüksək səviyyədə təşkil
olunduğunu bir daha sübut edir. Şagirdlərin əl işlərinin orjinallığı, öz
fikirlərini sərbəst şəkildə sərgi iştirakçılarına çatdıra bilmələri çox
təqdirəlayiqdir. Sonra Sabir Məmmədov liseyin müəllim-şagird
kollektivinə təhsildə uğurlar diləyib.
