Bir daha əmin oldum ki...
“Bu gün Azərbaycanımız 20 il öncəki Azərbaycan
deyil. O bu müddətdə bütün sahələr üzrə möhtəşəm inkişaf yolu keçib.
Hətta regionun ən inkişaf etmiş ölkəsinə çevrilib. İndi onun sorağı
dünyanın hər yerindən gəlir”. Bu sözləri millət vəkili Aydın Mirzəzadə
Mingəçevir Özəl Türk Liseyinin şagirdləri ilə keçirdiyi görüşdə deyib.
Onun sözlərinə görə, həmin yüksəlişə yeni nailiyyətlər əlavə etmək bu
gün parta arxasında oturan hər bir gəncin mənəvi borcudur: “Bu gün ölkə
başçısı İlham Əliyev təhsilimizin inkişafına xüsusi diqqət yetirir.
Sizin hər birinizin borcu isə bu qayğı sayəsində Azərbaycanımıza layiqli
vətəndaş olmaqdır”. Millət vəkili şagirdlərə öz tövsiyələrini də
verməyi unutmayıb: “Arzu edərdim ki, siz ingilis dili ilə yanaşı, digər
ölkələrin dillərini də əxz edəsiniz”. O həmçinin bir millət vəkili, bir
ziyalı kimi onlara hər zaman dəstək olmağa hazır olduğunu da dilə
gətirib. Görüş çərçivəsində liseyin fəaliyyəti ilə ətraflı tanış olan
millət vəkili təəssüratlarını qəzetimizlə də bölüşüb: “Artıq 20 ilə
yaxındır ki, Mingəçevir Özəl Türk Liseyi fəaliyyət göstərir. Bu təhsil
ocağındakı təhsilin keyfiyyəti, şagirdlərə milli ruhun aşılanması məndə
olduqca xoş təəssüratlar oyatdı. Mən hələ bu məktəbin məzunlarının,
demək olar ki, hamısının ali məktəblərə qəbul olunmalarını, onların
soraqlarının dünyanın müxtəlif ölkələrindən gəlmələrini demirəm. Bir
sözlə, bir daha əmin oldum ki, ölkəmizin sabahı onların sayəsində daha
parlaq olacaq”.
