Qafqaz Universitetində “Azərbaycan 2020: gələcəyə baxış” İnkişaf Konsepsiyası müzakirə edilmişdir
14 January, 2012
12.01.2010 tarixində Qafqaz Universitetində “Azərbaycan iqtisadiyyatının inkişafı 2020: gələcəyə baxış”
mövzusunda seminar keçirilmişdir. Seminarda Qafqaz Universitetin
rektoru, professor Əhməd Saniç; Azərbaycan Milli Elmlər Akademiyasının
(AMEA) İqtisadiyyat İnstitutunun direktoru, iqtisad elmləri doktoru,
professor İsa Alıyev; Azərbaycan İqtisadi İnkişaf Nazirliyinin (İİN)
İqtisadi İslahatlar Elmi-Tədqiqat İnstitutunun direktoru, iqtisad
elmləri doktoru Vilayət Vəliyev; AMEA-nın Elmi İnnovasiyalar Mərkəzinin
direktor müavini, iqtisad elmləri doktoru, professor Tərbiz Əliyev və
Qafqaz Universitetinin Dünya İqtisadiyyatı kafedrasının müdiri, dossent
Altay İsmayılov məruzə ilə çıxış etmişdirlər.
Tədbirin
açılış nitqində rektor Əhməd Saniç iştirakçılara Qafqaz Universitetinin
fəaliyyəti və uğurları barədə məlumat vermiş, elmin müxtəlif
istiqamətlərində ikitərəfli əməkdaşlıqların qurulmasında maraqlı
olduğunu bildirmişdir. Müasir dövrün tələblərinin nəzərə alınmasının
vacibliyini qeyd edən professor Saniç ali təhsil müəssisələrinin əsasən
üç istiqamətdə; tədris, elmi-tədqiqat və sosial məsuliyyət yönündə
fəaliyyətinin zəruriliyindən söhbət açmışdır.
AMEA-nın
İqtisadiyyat İnstitutunun direktoru, professor İsa Alıyev çıxışında
ölkədə elm sahəsində mövcud olan aktual problemlərdən danışmışdır.
Professor Alıyev ölkədə gedən iqtisadi inkişafın davamlı olması üçün
elmi işçilərin sözügedən problemlərin həllində səylərinin artırılmasının
vacibliyini qeyd etmişdir. O bildirmişdir ki, rəqabət qabiliyətli
məhsul istehsalının təşkili üçün əlverişli iqtisadi sistemin işlənib
hazırlanması hazırda elmi işçilərin öhdəliyinə düşən ən vacib məsələdir.
Daha
sonra Qafqaz Universiteti ilə AMEA-nın İqtisadiyyat İnstitutu arasında
əməkdaşlığa dair müqavilə imzalanmışdır. Müqavilədə qarşılıqlı kadr
mübadiləsi, elmi-tədqiqat işlərinin aparılması, birgə layihələrin həyata
keçirilməsi, o cümlədən sərgi, konfrans, simpozium və konfransların
təşkili kimi məsələlər nəzərdə tutulur.
Sonra
seminar natiqlərin çıxışları ilə davam etmişdir. İqtisad elmləri doktoru
Vilayət Vəliyev çıxışında ölkədaxili və qlobal çağırışlardan
danışmışdır. Onun sözlərinə görə, davamlı iqtisadi inkişafı təmin etmək
üçün kadr tələbatının müəyyənləşdirilməsi, iqtisadiyyatda elmi-texniki
yeniliklərdən istifadənin stimullaşdırılması, iqtisadi infrastrukturun
optimallaşdırılması və təkmilləşdirilməsi, regionların iqtisadi
inkişafının davam etdirilməsi, vahid statistikadan istifadənin təşviqi,
istehsal prosesində məhsuldarlığın və səmərəliliyin təşkili kimi
məsələlərin həlli zəruridir.
Professor
Tərbiz Əliyev isə öz çıxışında iqtisadiyyatda elmi innovasiya mühitinin
formalaşdırılması və bu istiqamətdə daha çox maliyyə vəsaitlərinin cəlb
olunmasının vacibliyini qeyd etmişdir. Ölkədə iqtisadi inkişafın
davamlılığının təmin edilməsində keyfiyətli kadr hazırlığının
əhəmiyyətindən danışan dossent Altay İsmayılov isə universitetlərə bu
istiqamətdə böyük məsuliyətin düşdüyünü vurğulamışdır.
Qeyd
edək ki, seminarın keçirilməsində məqsəd ölkə prezidenti İlham Əliyevin
29 noyabr 2011-ci il tarixində “Azərbaycan 2020: gələcəyə baxış” İnkişaf
Konsepsiyasının hazırlanması ilə əlaqədar imzaladığı sərəncamdan irəli
gələn məsələləri elmi işçilərin nəzərinə çatdırmaq və bu istiqamətdə
səyləri artırmaqdır. Tədbirdə Qafqaz Universitetinin akademik heyəti ilə
yanaşı AMEA-nin İqtisadiyyat İnstitutu, İİN-nin İqtisadi İslahatlar
Elmi-Tədqiqat İnstitutunun 30-dan çox mütəxəssisi iştirak etmişdir.
Rüstəm Hacıyev
