“Azərikimya” İB Qafqaz Universiteti iş birliyi qurub
19 January, 2012
ARDNŞ-in “Azərikimya” İstehsalat Birliyinin
kollektivi Qafqaz Universiteti ilə əlaqələri genişləndirir. ARDNŞ-dən
SİA-ya verilən məlumata görə, ali təhsil ocağının texniki və
iqtisadiyyat fakültələri tələbələrinin “Universitet – müəssisə” sistemi
üzrə Birliyin zavodlarında təcrübə keçmələri, nəzəri biliklərini
praktikada daha da təkmilləşdirmələri üçün “açıq qapı” şəraitinin
yaradılması istiqamətində işlər aparır. Bu günlərdə birliyin
sosial-mədəni həyatı və digər məsələlərlə bağlı informasiyaların
cəmiyyətə operativ şəkildə çatdırılması məqsədi ilə “Azərikimya”nın
internet səhifəsinin təkmilləşdirilməsi üçün istedadlı tələbələrin
texniki yaradıcılıq potensialından istifadə etmək qərara gəlinib. Qafqaz
Universitetində bununla bağlı görüş keçirilib. “Azərikimya” İB-nin
nümayəndələri kimya və sənaye mühəndisliyi fakültələri tələbələrinin
texniki yaradıcılıq nailiyyətləri, o cümlədən müəllimlərlə birgə
hazırladıqları roboto-texniki vasitələrlə tanış olublar. Yaxın günlərdə
“Azərikimya”nın İnformasiya texnologiyaları şöbəsinin əməkdaşları və
tələbələr Birliyin saytının təkmilləşdirilməsi üzrə işə başlayacaqlar.
