Naxçıvan türk liseyləri fərqləniblər
Tələbə Qəbulu üzrə Dövlət Komissiyası 2011-ci
il qəbul imtahanlarının nəticələri ilə bağlı statistik məlumatları
“Abituriyent” jurnalında dərc edib. Jurnalda ölkəmizdəki orta təhsil
müəssisələrinin ümumi göstəriciləri nəzərə alınaraq, ən yaxşı nəticə
göstərmiş məktəblər sıralanıb.
Bu göstəricilərə əsasən, ali məktəblərə son
qəbul imtahanlarında ən yaxşı nəticə göstərmiş ilk 15 məktəb arasında
Naxçıvan Muxtar Respublikasından 3 məktəb yer alıb. Belə ki, Naxçıvan
Türk Liseyi 2-ci, Şərur Türk Liseyi isə 7-ci olub. Ordubad Qız Liseyi
isə 11-ci yerdə qərarlaşıb. Naxçıvan Türk Liseyi ədəbiyyat, riyaziyyat,
fizika, kimya, coğrafiya fənləri üzrə ortalamalarında ölkə birincisi
olub. Şərur Türk Liseyi tarix fənni üzrə ikinci, fizika və kimya fənləri
üzrə isə üçüncü olub.
Naxçıvan Türk Liseylərinin baş direktoru Murat Çapan bizimlə
söhbətində təhsilə göstərilən qayğıdan və qazanılan uğurlardan söz
açmaqla yanaşı bildirib ki, ümummilli lider Heydər Əliyevin
uzaqgörənliyi ilə fəaliyyətə başlayan Naxçıvan türk liseylərinin
indiyədək 1000 nəfərdən artıq məzunu olub: “Ali məktəblərə ötən il
keçirilən qəbul imtahanlarında hər üç liseyimizdən 145 məzunumuzun 82
nəfəri 500-700 intervalında bal toplayıb, onlardan 3 məzun isə Prezident
təqaüdünə layiq görülüb”. Onun sözlərinə görə, bütün bu göstəricilər
ölkə və muxtar respublika rəhbərliyinin təhsilə göstərdiyi yüksək
qayğının nəticəsidir”.
Qeyd edək ki, sıralamada Naxçıvan Muxtar Respublikasının Babək rayon
Kərimbəyli kənd tam orta məktəbi alman dili üzrə üçüncü, Şərur rayon
Yengicə kənd tam orta məktəbi ilə Kəngərli rayon Qarabağlar kənd 2 saylı
tam orta məktəbi fransız dili üzrə müvafiq olaraq, dördüncü və
səkkizinci olublar.
