Təki Vətən sağ olsun
20 January, 2012
Qafqaz
Universiteti foyesinin bu günki tərtibatı hər kəsi ayaq saxlamağa və
Vətən uğrunda şəhid olanları sükutla yad etməyə səfərbər edirdi. Matəm
melodiyasının müşayiət etdiyi 1990-cı il 20 yanvar faciəsini əks etdirən
fotostendlər Azərbaycanın istiqlaliyyət yolunu işıqlandırdı.
Universitetin
Mədəniyyət şöbəsinin Azərbaycanın azadlığı və ərazi bütövlüyü uğrunda
mübarizə tarixinə qəhrəmanlıq səhifəsi kimi daxil olmuş 1990-cu il, 20
Yanvar faciəsinin 22-ci ildönümünə həsr olunmuş silsilə tədbirləri
çərçivəsində “Şəhidlər ölməz, Vətən bölünməz” adlı anım mərasimi
keçirildi. Mərasimin rəsmi hissəsində çıxış edən universitetin
prorektoru, professor Niftalı Qocayev şahidi olduğu 20 yanvar tarixi
haqqında dolğun məlumat verdi. Videogörüntülər vasitəsilə 20 yanvar
gecəsinə işıq salan natiq bu qanlı tarixi günə ilk dəfə qiyməti hələ
Moskvada yaşayarkən ulu öndər Heydər Əliyevin verdiyini vurğuladı.
Niftalı müəllim qeyd etdi ki, bütün hədə-qorxulara baxmayaraq ulu öndər
Moskvadakı Azərbaycan nümayəndəliyinə gələrək SSRİ rəhbərliyinin bu
işdə əli olduğunu açıqca bildirmişdi.
Sonra
dram kollektivinin ifasında Bəxtiyar Vahabzadənin “Şəhidlər” poeması
əsasında səhləşdirilən ədəbi-bədii kompazisiya təqdim oludnu.
Kompazisiyada 1990-cı ilin yanvar qırğını canlandırıldı, lakin xalqının
iradəsinin, milli azadlıq uğrunda əzminin qırılmadığı, həlak olan vətən
övladlarının Azərbaycan tarixinə parlaq səhifə yazdığı bədii obrazlı
şəkildə nümayiş olundu. Tələbə-aktyorlar Azərbaycan bayrağını fəxrlə
yüksəkdə tutaraq müstəqilliyə yol açan 20 yanvar tarixinin həm də qürur
günü olduğunu diqqətə çatdırdılar.
Mərasim
universitet rəhbərliyi və kollektivinin, “Oğuz” və “Sənaye
mühəndisliyi” klubu üzvlərinin hər bir azərbaycanlı üçün müqəddəs and
yerinə çevrilmiş Şəhidlər Xiyabanını ziyarətlə davam etdi. Ölkəmizin
azadlığı və ərazi bütövlüyü uğrunda mübarizədə canlarından keçən
qəhrəman Vətən övladlarının məzarları üstünə və “Əbədi məşəl”
abidəsinin önünə çiçəklər qoyuldu.
Azərbaycanlı
qardaşları ilə birlikdə əbədi olaraq uyuyan Qafqaz İslam Ordusunun igid
ərləri yad edildi. Universitetin ibtidai sinif müəllimliyi kafedrasının
professoru, doktor Əjdər Ağayev burada uyuyan şəhidlərimizin millətin
şərəfi, namusu üçün qurban getdiklərini söylədi. 22 il öncə Azərbaycan
xalqının qorxunc günlər yaşadığını vurğulayan Əjdər Ağayev inamla
bildirdi ki, şəhidlərə matəm saxlamaqla bərabər, onların şəhidlik
zirvəsinə baxıb başımızı dik tutmalıyıq. Qafqaz Araşdırmaları
İnstitutunun professoru, doktor Minaxanım Təkləli “Şəhidlər Xiyabanı”nın
Azərbaycanda və ümumiyyətlə Türk dünyasında bir simvol mahiyyəti
daşıdığını bildirdi. Maraqlı tarixi faktlara toxunan alim ziyarətçilərə
xitabən “Məlum oduğu kimi Şəhidlər Xiyabanının yerində Sovet hakimiyyəti
illərində park salınmış, beləliklə bu vətən torpağı üçün canlarını fəda
edən şəhidlərin əziz xatirəsi incidilmişdi. Azərbaycanın yenidən
müstəqillik qazanmasıyla sanki şəhidlər xiyabanı da uzun illər içində
olduğu əsarətdən qurtuldu. Şəhidlər Xiyabanındakı Qafqaz İslam
Ordusunun xatirəsini əbədiləşdirmək üçün ucaldılan fəxri məzarlar həm
Türkiyə-Azərbaycan qardaşlığının ölməz nişanəsi, həm də vətən uğrunda
şəhid olan igidlərin əziz xatirəsinə göstərilən dərin ehtiramın
ifadəsidir” söylədi.
Anım mərasimi şəhidlərin ruhuna oxunan dualarla yekunlaşdı.
