“Ana dilimizi sevək, sevdirək” müsabiqəsinin Şəki Finalı
Şəki Azərbaycan-Türkiyə Özəl Liseyində Azərbaycan Respublikasının
Dövlət Müstəqilliyinin bərpasının iyirminci ildönümünə həsr olunmuş “Ana
dilimizi sevək, sevdirək” müsabiqəsinin Şəki rayon finalı keçirilib.
Müsabiqədə Şəki şəhər Təhsil Şöbəsinin müdiri Südabər xanım İsmayılova,
Şəki şəhər Gənclər və İdman İdarəsinin rəisi Vüqar İsgəndərov,
Azərbaycan Yazıçılar Birliyinin Şəki bölməsinin sədri, Azərbaycan
Müəllimlər İnstitutu Şəki filialının müəllimi, görkəmli şair Vaqif
Aslan, Şəhər musiqi və orta ümumtəhsil məktəblərinin rəhbərləri iştirak
ediriblər. Tədbir Azərbaycan Respublikasının Dövlət Himni ilə başlaıb.
Sonra tədbirin aparıcısı Elmir İsgəndərov müsabiqənin tarixçəsi və
mahiyyəti barədə tədbir iştirakçılarına ətraflı məlumat verib. Sonra
Şəki Azərbaycan-Türkiyə Özəl Liseyinin müdiri İsmail Özcan çıxış edərək
müsabiqə iştirakçılarına uğurlar arzulayıb.
Şagirdlərin Ana dilinə böyük sevgi, vətənpərvərlik hisslərini
gücləndirmək, milli mənəvi dəyərləri qorumaq məqsədi daşıyan həmin
müsabiqədə Şəkidə fəaliyyət göstərən musiqi və orta ümumtəhsil
məktəblərindən şagirdlər cəlb edilib. 7, 8, 9,10, 11-ci sinif
şagirdləri müsabiqənin şeir və mahnı; 9,10 və 11-ci sinif şagirdləri isə
qrammatika və inşa kateqoriyası üzrə bilik və bacarıqlarını
sınayıblar.
Müsabiqədə inşa yazı kateqoriyası üzrə Şəki şəhəri 18 saylı məktəbin
10-cu sinif şagirdi Şəlalə Salamova, qrammatika üzrə test üsulu ilə
keçirilən müsabiqədə Şəki şəhəri 18 saylı orta məktəbin 10-cu sinif
şagirdi Nərmin Abdullayeva, mahnı kateqoriyası üzrə Şəki şəhəri 11 saylı
orta məktəbin 8-ci sinif şagirdi Rəhimə Əzimova, internet səhifəsi
hazırlama kateqoriyası üzrə Şəki şəhəri 18 saylı orta məktəbin 10-cu
sinif şagirdi Rövşən Kamallı, şeir kateqoriyası üzrə isə Şəki şəhəri 18
saylı orta məktəbin 10-cu sinif şagirdi Gültac Məmmədəminzadə birinci
yerə layiq görülüblər.
Tədbirin sonunda münsiflər heyətinin üzvlərinə və məktəblilərə xatirə hədiyyələri təqdim olunub.
