|
Artıq ali və orta ixtisas təhsili
müəssisələrində tədris ilinin ən məsul dövrü
yaxınlaşır. Qış imtahan sessiyasının həyəcan
dolu anlarını yaşayan tələbələr bu günlərdə
imtahan verəcəkləri fənlərə daha ciddi
hazırlaşırlar. Təbii ki, dərslərə daim
hazırlıqlı gələn, hər zaman yüksək bilik
səviyyələri ilə seçilən tələbələr imtahanlardan
da alnıaçıq, üzüağ çıxacaqlar.
Bəs builki qəbul imtahanlarında ən yüksək nəticə
göstərərək 700 bal toplayan tələbələr ilk
imtahanlara necə hazırlaşırlar?
Bu suallara aydınlıq gətirmək məqsədilə həmin
tələbələrin təhsil aldığı Qafqaz Universitetinin
dil hazırlığı fakültəsinin müdiri Celil Erdemlə
əlaqə saxladıq.
Celil müəllim bildirdi ki, 2011-2012-ci tədris
ilində Qafqaz Universitetinə 700 balla qəbul
olunmuş tələbələrin dördü də mühəndislik
fakültəsində oxuyur. Bu tələbələr bizləri çox
ümidləndirdi. Həqiqətən onların toplamış
olduqları bu balların təsadüfi olmadığını və çox
qabiliyyətli olduqlarını keçən bu 3 ay ərzində
sübut etdilər. Hazırda 700 bal toplayan
tələbələrimiz universitetimizin hazırlıq
fakültəsində ingilis dili üzrə təhsillərini
davam etdirirlər. Onlar həm dərslərində çox
bacarıqlı, həm də tərbiyələri cəhətdən nümunəvi
tələbələrimizdir.
Qarşıdan gələn bu yeni ildə isə bütün təhsil
işçilərinə və tələbələrimizə təhsildə uca
zirvələr fəth etməkdə müvəffəqiyyətlər
arzulayıram.
Biz Celil müəllimin tələbələri haqqında
söylədiyi bu xoş sözlərindən sonra onların
özləri ilə əlaqə yaratdıq. Universitetdə necə
oxuduqları, ilk imtahanlara necə hazırlaşdıqları,
müəllimlərinin etimadını necə doğrultduqları,
Yeni il arzuları və s. suallar əsasında
məlumatlar əldə etdik. 700 bal toplamış həmin
tələbələrin ürək sözləri ilə oxucularımızı da
tanış etmək istəyirik.
Məmmədova Ləman Elşən qızı
 Yola
salmaq ərəfəsində olduğumuz 2011-ci il mənim
üçün çox uğurlu bir il olub. Mən bu il Bakıdakı
169 nömrəli tam orta məktəbi "əla" qiymətlərlə
bitirdim və ali məktəblərə qəbul imtahanlarında
ən yüksək-700 bal toplayaraq Qafqaz
Universitetinin mühəndislik fakültəsinə daxil
oldum. İnformasiya texnologiyaları və sistemləri
mühəndisliyi ixtisasını seçdim. Təbii ki, bu
təkcə mənim yox, həmçinin sevimli
valideynlərimin və müəllimlərimin də uğurudur.
Buna görə də mənə dəstək olan, bu sonsuz
sevincimi mənimlə paylaşan valideynlərimə,
qələbəmə hamıdan çox sevinən nənəmə, məzunu
olduğum məktəbin müəllimlərinə minnətdaram.
Sevincim bununla bitmədi. Elə bu uğuruma görə də
Azərbaycan Respublikasının Prezidenti cənab
İlham Əliyevin 1 sentyabr 2011-ci il tarixli
sərəncamı ilə Prezident təqaüdünə layiq görüldüm.
Sevincimin üstünə daha bir sevinc də əlavə
olundu. Buna görə də təhsilimizə daim qayğı
göstərən ölkə başçısına öz dərin təşəkkürümü
bildirirəm.
Hazırda birinci kurs tələbəsi olduğum Qafqaz
Universitetində dərslərimi müntəzəm oxuyur,
yaradılan şəraitdən maksimum yararlanmağa
çalışıram. Bizim yüksək təhsil almağımız üçün
hər bir şərait yaradan rektorumuz Ahmet Saniçə,
dil-öyrətim koordinatoru Celil Erdemə və sinif
rəhbərim Venera Vəkilovaya öz minnətdarlığımı
bildirirəm.
Böyük inamla seçdiyim ixtisasım dövrümüzün ən
lazımlı və səmərəli sahələrindən biridir və
müasir dövrümüzdə məktəblər, səhiyyə ocaqları,
şirkətlər informasiyalaşdırılır. Elə buna görə
universitetdə hər iki aydan bir aparılan
imtahanlarda qazandığım nəticənin 91 baldan
yuxarı olmasına çalışıram. İnanıram ki,
Prezident təqaüdçüsü adımı sonuncu kursa kimi
özümün yüksək biliyim və bacarığımla doğrultmağa
nail olacağam.
Sonda qarşıdan gələn Dünya Azərbaycanlılarının
Həmrəylik Günü və Yeni il bayramı münasibəti ilə
məzunu olduğum məktəbin müəllim kollektivini,
hazırda təhsil aldığım Qafqaz Universitetinin
müəllim və tələbələrini ürəkdən təbrik edirəm.
Camallı Cahandar İlqar oğlu
 Mənim
üçün də 2011-ci il çox uğurlu bir il olub. Bu il
qəbul imtahanlarında ən yüksək-700 bal
toplayaraq tələbə adını qazandım. Əlbəttə,
sevincim sonsuzdur. Bu qələbə sevincinin əldə
olunmasında on bir il təhsil aldığım Bakının
Xətai rayonundakı A.S.Xəlilov adına 263 nömrəli
orta məktəbin müəllim kollektivinə və qəbul
imtahanlarına hazırlaşmağımda mənə böyük kömək
olan Xətai "Araz" kursunun bütün kollektivinə öz
təşəkkürümü bildirirəm. Ona görə ki, onların
sayəsində qazandığım bu uğuruma görə də
Azərbaycan Respublikasının Prezidenti cənab
İlham Əliyevin 1 sentyabr 2011-ci il tarixli
sərəncamı ilə Prezident təqaüdünə layiq görüldüm.
İndi isə Qafqaz Universiteti kimi prestijli və
yüksək təhsil keyfiyyəti olan bir universitetin
birinci kursunda, kompüter mühəndisliyi ixtisası
üzrə təhsil alıram. Dərslərimə səylə çalışır,
asudə vaxtlarımı səmərəli keçirirəm.
Burada biz bu tədris ilində yalnız indilis dili
hazırlığı ilə məşğul olur, dilin incəliklərinə
mükəmməl yiyələnirik. İngilis dilinin
qrammatikası, danışıq dili və yazı üzrə
biliklərimizi hər gün artırmağa səy göstəririk.
Mən hər iki aydan bir aparılan imtahanlarda
tələb olunan 91-dən yuxarı bal toplayır,
Prezident təqaüdçüsü, qəbul imtahanlarında 700
bal toplayan bir tələbə kimi etimadı doğrulduram.
Orta məktəbdə mənə dərs demiş müəllimlərimin
hamısı əmin ola bilər ki, ali məktəbdə də öz
yüksək biliyim, nümunəvi davranışımla onların
başını uca edəcəyəm.
Fürsətdən istifadə edərək qarşıdan gələn Dünya
Azərbaycanlılarının Həmrəylik Günü və Yeni il
bayramı münasibəti ilə valideynlərimi, orta
məktəb müəllimlərimi və hazırda təhsil aldığım
Qafqaz Universitetinin bütün təhsil işçilərini
təbrik edirəm. Onlara 2012-ci ildə yeni-yeni
uğurlar diləyirəm.
Feyzullayeva Xavər Canbulat qızı
 Universitetin
mühəndislik fakültəsində kimya mühəndisliyi
ixtisası üzrə təhsil alıram. Seçdiyim bu
ixtisasın layiqli sahibi olmaq üçün ingilis
dilini mükəmməl öyrənməyin vacib olduğunu yaxşı
dərk edirəm. Bu dərs ili birinci ilimiz
olduğundan qaydaya görə yalnız ingilis dili
öyrənirik. Ona görə ki, üzümüzə gələn ildən
başlayaraq dörd il ixtisasımıza aid olan bütün
dərsləri ingilis dilində keçəcəyik. Hazırda dil
hazırlığı dərslərimiz sistemli şəkildə aparılır.
Hər iki aydan bir, bir səviyyədən digər
səviyyəyə keçmək üçün dil koordinatorluğunda
oxuyan tələbələrə imtahan olur. Mən hazırda 3-cü
səviyyədə oxuyuram. Universitetimizdə yüksək
təhsilə xüsusi önəm verilir və yaxşı oxuyan
tələbələr qiymətləndirilir. Mən 2-ci səviyyədən
3-cü səviyyəyə keçənlər arasında 92 balla
birinci yerdə olduğuma görə rektorumuz Ahmet
Saniç tərəfindən diplomla mükafatlandırıldım.
Bunlarla yanaşı, universitetimizdə tələbələrin
asudə vaxtlarını səmərəli keçirmələri üçün
müxtəlif klublar, dərnəklər, kurslar fəaliyyət
göstərir. Mən skripka, mühəndislik və kitab
klublarına üzv yazılmışam. Onu da deyim ki,
burada müəllim-tələbə münasibətləri yüksək
səviyyədədir. Biz istədiyimiz vaxt dərsdən əlavə
olaraq başa düşmədiklərimizi müəllimlərimizdən
soruşa, öyrənə bilirik.
Bütün bunlarla bərabər Qafqaz Universitetində
təhsil alan tələbə yoldaşlarım kimi mənim də
əsas məqsədim yüksək təhsil almaq, qəbul
imtahanlarında topladığım ən yüksək- 700 balın
təsadüfi bal olmadığını reallaşdırmaq, Vətənə
layiq bir övlad kimi yetişmək, öz sahəmiz üzrə
ixtisaslaşmaq və cəmiyyətdə özümə layiqli yer
tutmaqdır.
Yeri gəlmişkən, qarşıdan gələn Dünya
Azərbaycanlılarının Həmrəylik Günü və Yeni il
bayramı münasibəti ilə valideynlərimi, bütün
müəllimlərimi səmimi-qəlbdən təbrik edirəm.
Əliyev Əli Rəhbər oğlu
 Mən
bu il minlərlə abituriyentin arzusu olan 700 bal
zirvəsinə qalxmağı bacardım. Bu da mənim ən
böyük uğurum, sonsuz sevincim oldu. Qafqaz
Universitetinin mühəndislik fakültəsinin
informasiya texnologiyaları və sistemləri
mühəndisliyi ixtisasını seçdim. Burada təhsil
aldığım bu üç aydan bir qədər çox zaman ərzində
həm dərslərimə yüksək səylə hazırlaşır, həm də
müəllimlərimin rəğbətini qazanmağa çalışıram.
Bütün bunları ona görə inamla deyirəm ki,
universitetimizdə bizə dil hazırlığı üzrə çox
təcrübəli müəllimlər dərs deyir. İndiyə kimi
verdiyim imtahanlardan 91 baldan yüksək bal
toplamışam. Bu da həm müəllimlərimi razı salıb,
həm də Prezident təqaüdçüsü adımı sonuncu kursa
kimi doğruldacağıma məndə əminlik yaradıb.
Bütün bunlara rəğmən onu da deyim ki, əgər
müəllim üçün ən böyük xoşbəxtlik şağirdinin
uğurunu görməkdirsə, şagirdin də ən böyük
xoşbəxtliyi onun qarşısına öz yüksək biliyini
əsirgəməyən müəllimin çıxmasıdır. Buna görə də
mən özümü xoşbəxt sayıram. Çünki qarşıma həm
orta məktəbdə, həm də indi təhsil aldığım
universitetdə yüksək biliyə malik müəllimlər
çıxıb.
Bir arzum da odur ki, gələcəkdə təhsilimi xarici
ölkələrdə-Qərbi Avropada və ya Amerikada davam
etdirim. Daha yüksək ixtisaslı bir kadr kimi
doğma Vətənimə layiqincə xidmət edim.
Sonda isə qarşıdan gələn Dünya
Azərbaycanlılarının Həmrəylik Günü və Yeni il
bayramı münasibəti ilə ilk növbədə
valideynlərimi, orta təhsil aldığım Bakı
şəhərindəki 27 nömrəli məktəbin və 287 nömrəli "Zəkalar"
liseyinin, hazırda təhsil aldığım Qafqaz
Universitetinin bütün müəllim kollektivini və
dostlarımı təbrik edir, onlara aydın səma və
xoşbəxtlik arzulayıram.
Səhifəni hazırladı: Ədalət DAŞDƏMİRLİ
|
