“Azərikimya” İstehsalat Birliyində Qafqaz Universitetinin müəllim və tələbələri ilə görüş olmuşdur
ARDNŞ-nin
“Azərikimya” İstehsalat Birliyi və inşasına yeni başlanılan Sumqayıt
Karbamid zavodu rəhbərliyinin Qafqaz Universitetinin müəllimləri, kimya
mühəndisliyi, sənayenin təşkili və idarə edilməsi fakültələrinin
tələbələri ilə görüşü keçirilmişdir.
ARDNŞ-in strukturuna daxil ediləndən sonra Birliyin
müəssisələrində həyata keçirilən rekonstruksiya və yeniləşdirmə,
müasirləşdirmə işlərindən ətraflı söhbət açan “Azərikimya” İB Müşahidə
Şurasının sədri, Milli Məclisin deputatı Muxtar Babayev Qafqaz
Universiteti ilə təməli bir il əvvəl qoyulmuş əməkdaşlığın və artıq
ənənə halını almış görüşlərin hər iki tərəf üçün faydalı olduğunu
vurğulamışdır.
Bildirilmişdir ki, respublikanın müxtəlif ali texniki
məktəblərində neft-kimya ixtisasları üzrə təhsil alan tələbələrin
istehsalatda təcrübə keçməsi Birlik tərəfindən diqqət mərkəzində
saxlanılır. Görüşdə Azərbaycan Respublikasının Prezidenti cənab İlham
Əliyev tərəfindən təməli qoyulmuş Karbamid zavodu və inşa olunması
nəzərdə tutulan Kimya Sənaye Parkı layihələri ilə bağlı geniş məlumat
verilmiş, bu müəssisələrin ilkin layihə görüntüləri slaydlarla tədbir
iştirakçılarına nümayiş etdirilmişdir.
Qafqaz Universitetinin kafedra
müdiri, dosent Yusif Abdullayev səmimi qəbula görə “Azərikimya” İB
rəhbərliyinə təşəkkürünü bildirmiş, təmsil etdiyi Qafqaz Universitetinin
yarandığı gündən Azərbaycanla Türkiyə arasında elmi-mədəni əlaqələrin
genişlənməsi baxımından tarixi missiya yerinə yetirməsindən danışmışdır.
Qeyd edilmişdir ki, Universitetdə artıq ikinci ildir, kimya
mühəndisliyi ixtisası üzrə kadr hazırlığına başlanılmışdır, gələn ildən
isə neft mühəndisliyi ixtisası üzrə tələbə qəbulu təşkil ediləcəkdir.
Neft-kimya ixtisasları üzrə təhsil alan bütün tələbələrin Birliyin
müəssisələrində müvafiq təcrübə keçmələri də nəzərdə tutulmuşdur.
Görüşdə “Azərikimya” İB və Qafqaz Universiteti arasında qarşılıqlı
faydalı əməkdaşlığın gələcəkdə də inkişaf etdirilməsi üçün
əlaqələndirici bir qurumun yaradılması məqsədəuyğun hesab edilmişdir. Bu
baxımdan həm tələbə və müəllimlər, həm də istehsalatda çalışan
kimyaçılardan ibarət “Kimya klubu”nun yaradılması təklif olunmuşdur.
