Gəncə Dövlət Universitetində görüş
Gəncə
Azərbaycan -Türkiyə Özəl Liseyinin müdiri Kenan Güzel və Gəncə “Araz”
Kurslarının müdiri Sədrəddin Sədirli Gəncə Dövlət Universitetində (GDU)
olublar. Universitetin rektoru, professor Elman Məmmədovla görüşən
qonaqlar rəhbərlik etdikləri təhsil ocaqlarının fəaliyyəti, təhsildə
əldə etdikləri uğurları barədə məlumat veriblər.
TQDK-nın ali məktəblərə
qəbulla bağlı keçirdiyi imtahanlarda yüksək bal toplayaraq
respublikamızın eləcə də dünyanın nüfuzlu universitetlərində
təhsillərini uğurla davam etdirmələrindən, beynəlxalq fənn və layihə
olimpiadalarından ölkəmizə medallarla dönmələrindən söhbət açıblar.
Bu
yaxınlarda keçirilmiş dünyanın 42 ölkəsindən 400-ə qədər şagirdin
iştirak etdiyi Beynəlxalq Ətraf Mühitin Mühafizəsi Layihə
Olimpiyadasında (İNEPO) liseyin iki şagirdi medallara layiq
görülməsindən danışıblar.
Lisey və Gəncə “Araz” Kursunun
nailiyyətlərindən məmnun olduğunu bildirən rektor, Azərbaycanda
fəaliyyətinin 20 illik yubileyini qeyd edən “Çağ” Öyrətim İşlətmələri
Şirkətinin rəhbərliyini və bütün pedoqoji kollektivini təbrik edərək,
onlara fəaliyyətlərində uğurlar arzulayıb.
