Festivaldan qələbə ilə dönən qaliblər
16 April, 2012
Gənclər
və İdman Nazirliyi və Azərbaycan Tələbə Gənclər Təşkilatları İttifaqı
ilə birgə təşkilatçılığı ilə cari ilin 10-11 aprel tarixlərində “Tələbə
baharı” VI Ümumrespublika tələbə yaradıcılığı festivalının seçim
mərhələsi keçirildi. Festivalın keçirilməsində əsas məqsəd, tələbələrin
estetik tərbiyə sistemini təkmilləşdirmək, yaradıcı və istedadlı
gəncləri üzə çıxarmaq, onlara dövlət qayğısını artırmaq, asudə
vaxtlarını səmərəli təşkil etmək və yeni ünsiyyət əlaqələrinin
formalaşdırılmasına şərait yaratmaqdır.
Tədbirə
yaradıcı tələbələri və kollektivləri ilə qatılan Qafqaz Universiteti
böyük rəğbət sahibinə çevrildi. “Tələbə baharı” VI Ümumrespublika tələbə
yaradıcılığı festivalının seçim mərhələsində Qafqaz Universitetini
təmsil edən istedadlı gənclər müxtəlif nominasiyalar və janrlar üzrə
müvəffəqiyyət qazandılar. Beynəlxalq status daşıyan festivalda
universitetin Millli rəqslər üzrə (oğlanlardan ibarət) kollektivi I
yerə, Millli rəqslər üzrə (qızlardan ibarət) kollektivi II yerə, pop
musiqisi üzrə (duet ifa) I yerə, xalq musiqisi üzrə (solo ifa) II yerə
layiq görüldü.
“Tələbə
baharı” VI Ümumrespublika tələbə yaradıcılığı festivalının Qala
konsertinin 17-19 aprel tarixlərində Gəncə şəhərində keçirilməsi
planlaşdırılır. Tələbələrimizi əldə etdikləri yaradıcılıq uğurları
münasibətilə təbrik edir, onlara universitetimizi layiqincə təmsil
etmək, dünya miqyasında onun yüksək imicini qoruyub saxlamaq naminə
gördüyü işlərdə müvəffəqiyyətlər arzulayırıq.
