20-ci il və barak-siniflərdən dünyaya ...
Rıfat Ilqazın “Hababam sinfi” adlı yumor
kitabının ekranlaşdırılmış variantına bu günə qədər milyonlarla insan
tamaşa edib. Filmin bir yerində Hababam sinfinin məşhur müəllimi Keçəl
Mahmudun söylədiyi: “Məktəb yalnız dörd divarı, bir damı olan yer deyil,
məktəb hər yerdir ...” sözləri əksəriyyətin dilində əzbər olub.
Bu günlərdə Avstraliyanın Sidney şəhərində Şulə
kollecinin 2012-ci il məzunları üçün təşkil edilən mərasimə qatıldım.
Tədbir başlamazdan əvvəl qonaqlarla söhbətimiz zamanı məktəbin ilk
günləri anıldı və “Haradan hara gəldi” deyənlər oldu. “Hababam sinfin”də
deyilən “məktəb hər yerdir” ifadəsəni də bu səbəbdən xatırladım.
Şulə kolleci 1995-ci ildə təhsil fəaliyyətinə “portable”, yəni
daşınabilən konteyner böyüklüyündəki taxta barakda başlamışdı. Bu gün
Sidneydə iki düşərgəsi, binası və əyani vasitələri ilə çox yaxşı
imkanlara sahib olan Şulə kolleci universitetlərə tələbə vermək
sahəsində NSV (New South Wales) əyalətində ad çıxarmış bir təhsil
ocağıdır.
Sidneyin gözəl məkanlarından birində keçirilən məzun gecəsində
iştirak edən Türkiyə səfirliyinin Sydneydəki Təhsil Attaşesi əvəzi də
kollecin qazandığı müvəffəqiyyətlərə diqqət çəkdikdən sonra onun
Avstraliyada yaşayan cəmiyyət üçün əhəmiyyətindən danışdı.
Bu gün Avstraliya xarici işlər naziri olan Bob Karr, NSW Əyalət Baş
Naziri olduğu illərdə Şulə kollecini ziyarəti edərkən ifadə etdiyi “bu
məktəblərdən məzun olanları ən yaxşı yerlərdə görmək istəyirəm” sözləri
bu gün reallığa çevrilib.
Şulə kolleci məzun gecəsi keçirilən gün minlərlə kilometr kənarda,
Azərbaycanın Quba şəhərində Türkiyədən gələn təhsil könüllülərinin
1993-cü ildə açmış olduqları Türk Liseyində də bir mərasim idi. “Çağ”
Öyrətim Şirkətinə bağlı Quba Özəl Türk Liseyini ziyarət edən Türkiyənin
Azərbaycandakı səfiri İsmayıl Alper Coşkun “Gələcək nəsillərin
yetişdirildiyi məktəblərdə aparılan işlər çox əhəmiyyətlidir” deyərək,
təhsil üçün edilən fədakarlıqların əhəmiyyətini vurğulayırdı.
Quba Türk Liseyi də konteyner böyüklüyündəki taxta barakalarda
fəaliyyətə başlamışdı. Bu barakalardan riyaziyyat üzrə “dünya çempionu”
çıxdı. Quba liseyi bu günə qədər 45-ə qədər medal alıb. Daşınabilən
barak-siniflərdən ikisi bu gün də muzey olaraq məktəbin bağçasında
qorunur və içində köhnə illərə aid fotoşəkillər saxlanılır. Dünyanın
məşhur elm adamlarından olan professor Kamal Karpat uğurları barədə
eşitdiyi bu məktəb görmək üçün Qubaya gəlmiş və buradakı barak-sinifləri
görüncə kövrəlmişdi. Xatırladaq ki, bu barak-siniflərin taxta qapısı
eyni zamanda yazı lövhəsi kimi istifadə edilirmiş. Bu məktəbdən məzun
olan jurnalist yoldaşımız, o günləri xatırlayarkən bildirdi ki,
lövhədən istifadə etmək üçün sinfin qapısı bağlı olmalı idi. O
siniflərdə qışın soyuğunda, yayın istisində dərs demək asan olmayıb.
Fədakar təhsil heyəti oralardan dünya səviyyəsində çempionlar çıxardı.
Bu gün o məktəbdən məzun olanların çoxu Azərbaycanda və xarici ölkələrdə
böyük uğurlara imza atırlar. Əlbəttə, daha sonralar Quba Türk Liseyi
üçün yeni bina tikildi və məktəb müasir avadanlıqlarla təmin edildi.
Bir neçə ay əvvəl də “ağıllı lövhə”lər “Çağ” Öyrətim şirkətinin bütün
məktəblərində şagirdlərin ixtiyarına verildi. Quba Liseyinin
məzunlarının bu il qəbul imtahanlarında topladıqları orta balla ölkə
birincisi olduqlarını da xatırlatmaq yerinə düşər.
Azərbaycanda Quba liseyi kimi, çoxlu təhsil müəssisəsini özündə
birləşdirən “Çağ” Öyrətim şirkəti 27 noyabr günü təntənəli mərasimlə
Bakıda 20-ci ilini qeyd edəcək.
Bu gün “Çağ” Öyrətim şirkətinin məktəblərini, universitetə hazırlıq
kurslarını və Qafqaz Universitetini bitirən azərbaycanlı gənclər
dünyanın müxtəlif yerlərində qazandıqları uğurlarla Azərbaycanı ən yaxşı
şəkildə təmsil edirlər.
“Çağ” Öyrətim şirkətinin fəaliyyətinin 20-ci ili münasibətilə təbrik
edir, uğurlarının davam etməsini arzulayıram. s.unal@zaman.az
http://www.zaman.az/az/columnistDetail_getNewsById.action?newsId=45910
