Qafqaz Universitetində Nizami Gəncəvinin 870 illik yubileyinə həsr olunan tədbir keçirildi



Azərbaycan Qafqaz Universitetinin Akt zalında dünya ədəbiyyatının görkəmli nümayəndəsi, dahi Azərbaycan şairi və mütəfəkkiri Nizami Gəncəvinin 870 illik yubileyinə həsr olunan tədbir keçirilib. 

Publika.Az-ın verdiyi xəbərə görə,  “Nizami Gəncəvi və Şərq ədəbiyyatları” adlı beynəlxalq elmi konfrans AMEA akad. Ziya Bünyadov adına Şərqşünaslıq İnstitutu və Azərbaycan Qafqaz Universitetinin birgə təşkil ediblər. Konfransda Azərbaycan, Türkiyə və İran alimləri iştirak ediblər.
Konfransın açılış mərasimində Azərbaycan Qafqaz Universitetinin rektoru, professor, doktor Ahmet Sanıc və millət vəkili, AMEA akad. Z.Bünyadov adına Şərqşünaslıq İnstitutunun direktoru, filologiya elmləri doktoru, professor Gövhər Baxşəliyeva giriş nitqi söyləyiblər. Ahmet Sanıc ümumbəşəri mahiyyət daşıyan, ecazkar poetik qüvvəyə malik yaradıcılığı ilə Şərq bədii təfəkkürünü elmi-fəlsəfi fikirlərlə zənginləşdirmiş Nizami Gəncəvinin əsərləri, şeir və düşüncə dünyası haqqında Türkiyədə də bir çox dəyərli elmi tədqiqatlar aparıldığını qeyd edib. Dr. Ahmet Sanıc rəhbərlik etdiyi Azərbaycan Qafqaz Universitetində də Nizami yaradıcılığına, dahi şairin şeir və fəlsəfə dünyasına önəm verildiyini diqqətə çatdırıb, AMEA Şərqşünaslıq İnstitutu ilə birgə “Nizami Gəncəvi və Şərq ədəbiyyatları” adlı beynəlxalq elmi konfransın təşkilinin də buna əyani sübut olduğunu bildirib.
Şərqşünaslıq İnstitutunun direktoru, filologiya elmləri doktoru, professor Gövhər Baxşəliyeva Nizami Gəncəvinin 870 illik yubileyinin Azərbaycanın mədəni həyatında böyük hadisə olduğunu qeyd etdi və xalqımızın mədəniyyətini, ədəbiyyatını, elmini həmişə diqqət və qayğısı ilə əhatə edən möhtərəm Prezidentimiz İlham Əliyevin ötən ilin dekabrında imzaladığı Sərəncamla bu yubileyin bu il Respublikamızda böyük təntənə ilə qeyd edildiyini bildirdi. Gövhər xanım qeyd etdi ki, tək Azərbaycan ədəbiyyatının deyil, bütövlükdə Şərq ədəbiyyatının parlaq günəşi olan Nizami Gəncəvinin yaradıcılığını, Nizami əsərlərinin Şərq ədəbiyyatına təsirini tədqiq etmiş şərqşünaslarımız bu yubiley tədbirlərindən kənar qala bilməzdilər. “Nizami Gəncəvi və Şərq ədəbiyyatları” adlı beynəlxalq elmi konfransın Nizamişünaslığa böyük bir töhfə olduğunu söyləyən G.Baxşəliyeva şairin yaradıcılığının əsas ideya məğzindən söz açdı: «12-ci əsr intibah dövrü Gəncəsində yaşayıb-yaradan dahi Azərbaycan şairi Nizami Gəncəvinin yaradıcılığı bütün parametrlərinə görə bəşər tarixində qlobal hadisədir. İstər ideya tematik, istər bədii estetik, istərsə də bir çox Şərq xalqları ədəbiyyatlarının, o cümlədən fars, türk, urdu, hind, kürd, özbək və s. xalqların ədəbiyyatlarının inkişafına təsiri baxımından. Təsadüfi deyil ki, Nizaminin əsərlərinə 500-ə qədər nəzirə yazılıb. Humanist ideyalar carçısı Nizami Gəncəvinin yaradıcılığında Şərq və antik ədəbi, fəlsəfi və mədəni dəyərləri üzvi şəkildə sintez olunmuşdur. Mütəxəssislər Nizami yaradıcılığını tam mənası ilə klassik dövrün yeni mərhələsi adlandırırlar. Çünki məhz Nizaminin yüksək humanist fikirlərində orta əsrlər mistikasından oyanıb sağlam təfəkkürlə insana və cəmiyyət həyatının məna və mahiyyətinə rasional məntiqi yanaşma tərzinin şahidi oluruq. İnsan xoşbəxt yaşamaq üçün yaradılıb və bu ilahi qədəri heç bir şər qüvvə dəyişdirə bilməz. Budur Nizami yaradıcılığının əsas ideya məğzi».
Gövhər Baxşəliyeva daha sonra Nizami yaradıcılığının əsas istiqamətlərindən, onun Şərq ədəbiyyatlarına təsirindən, bu sahədə aparılan tədqiqatlardan söz açdı, dünya poeziyasına bir-birindən dəyərli söz sənəti inciləri bəxş etmiş şairin yaradıcılığına həsr olunmuş konfransın işinə uğurlar dilədi.
Daha sonra söz məruzəçilərə verildi. İlk olaraq AMEA akad. Z.Bünyadov adına Şərqşünaslıq İnstitutunun baş elmi işçisi, filologiya elmləri doktoru, professor Nüşabə Araslı “Nizami və sələfləri” mövzusunda məruzə ilə çıxış etdi. N.Araslı məruzəsində Nizami yaradıcılığının böyüklüyündən söz açaraq, dahi şairin yaradıcılığının ümumşərq mədəniyyətinin fikri-estetik nailiyyətləri ilə yaxından bağlı olub, klassik irsin özünəqədərki ən gözəl ənənələri üzərində ucaldığını qeyd etdi. Məruzəçi Nizaminin sələflərindən danışaraq, bu sırada görkəmli Azərbaycan şairi Xaqaninin xüsusi yerini vurğuladı və bu barədə daha geniş söz açdı.
AMEA akad. Z.Bünyadov adına Şərqşünaslıq İnstitutunun “Yazılı abidələrin tədqiqi və nəşri” şöbəsinin müdiri filologiya elmləri doktoru, professor Mehdi Kazımov “Şərq ədəbiyyatında Nizami ənənələri” mövzusunda məruzə etdi. Türkiyə, Selçuk Universitetinin professoru, Dr. Ali Temizel Türkiyədə Nizami Gəncəvinin yaradıcılığının tədqiqindən məruzə etdi. Azərbaycan Qafqaz Universitetinin müəllimi Setter Durmaz türk ədəbiyyatında «Xəmsə» yaradıcılığında Nizami Gəncəvinin rolundan danışdı. İran Elm və Mədəniyyət Universitetinin müəllimi Fərzad Qasımzadə “Dünya ədəbiyyatının iftixarı – Nizami Gəncəvi” mövzusunda məruzə etdi. AMEA akad. Z.Bünyadov adına Şərqşünaslıq İnstitutunun böyük elmi işçisi, filologiya üzrə fəlsəfə doktoru Səadət Şıxıyeva «Nəsiminin fikir düzənində Nizami məntiqi və söz sənətindən təsirlənmələr» mövzusunda məruzə ilə çıxış etdi.
Tədbirin gedişində AMEA akad. Ziya Bünyadov adına Şərqşünaslıq İnstitutu və Azərbaycan Qafqaz Universiteti arasında elmi-təşkilati əməkdaşlıq Protokolu imzalandı. Protokolu Şərqşünaslıq İnstitutunun direktoru, filologiya elmləri doktoru, professor Gövhər Baxşəliyeva və Azərbaycan Qafqaz Universitetinin rektoru, professor, doktor Ahmet Sanıc imzaladılar.
Tədbirin sonunda AMEA akad. Z.Bünyadov adına Şərqşünaslıq İnstitutunun direktoru, filologiya elmləri doktoru, professor Gövhər Baxşəliyeva və Azərbaycan Qafqaz Universitetinin rektoru, professor, doktor Ahmet Sanıc yekun nitqi söyləyərək, konfrans iştirakçılarına öz təşəkkürlərini bildirdilər.
http://www.publika.az/index.php?action=static_detail&static_id=27257

Bu blogdaki popüler yayınlar

Azerbaijan - GOV - Azerbaijan to Host an International ICT Conference

Özəl və dövlət ali təhsil məktəbləri arasındakı fərq

VİCDAN SUSTUĞUNDA : Download PDF