Quba Özəl Türk Liseyində elmi-əyləncəli tədbir keçirilib
Belə ki, liseydə riyazi ədəd olan "pi"yə həsr olunmuş
xüsusi guşədə 7-ci sinif şagirdləri hazırladıqları tortları və
köynəkləri nümayiş etdiriblər. Tədbirin təşkilatçısı və təşəbbüskarı,
liseyin direktor müavini Məsut Bulak bildirib ki, əyləncəli proqramların
şagirdlərin elmə olan marağını artırmağa xidmət edir. Onun sözlərinə
görə, elmə həsr olunan belə sosial proqramlar həm də şagirdlərin fərdi
yaradıcılıqlarına təkan verir. Liseyin 7-ci sinif şagirdi Tağı Məmmədov
bu proqrama on gün hazırlaşdığını və bu müddətdə "pi" lə bağlı
araşdırmalar apardığını deyib. O həmçinin bu araşdırmalar zamanı yeni
materiallarla tanış olduğunu da söyləyib.
Hazırladığı köynək üzərində "pi"yə öz
düşüncələri əsasında forma verən şagirdlərdən Oruc Əliyev
axtarışlarından məmnun qaldığını, Eldar Eyvazov isə belə tədbirlərin
əyləncəli olduğunu vurğulamaqla yanaşı, həm də qeyri-adi bir öyrənmə
üsulu olduğunu bildirib.
Qeyd edək ki, yarışmada Elçin Sultanzadənin
(tort hazırlığı nominasiyasında), İsmayıl Səfərovun (köynək
nominasiyasında) "pi"yə verdikləri bəzəklər birinci yerə layiq görülüb.
Qiymətləndirmə liseyin müəllim heyəti tərəfindən həyata keçirilib.
Sərgidə 17 nəfər şagird "pi"li tort, 16 nəfər şagird isə "pi"li köynək
nümayiş etdirib.
Yeri gəlmişkən, onu da qeyd edək ki,
sərgidə şagirdlər "pi" ilə bağlı biliklərini də göstəriblər. Belə ki,
liseyin şagirdi Eşqin Məmmədov "pi"nin qiymətinin tamdan sonrakı 500
rəqəmi əzbər söyləyib. (Qeyd edək ki, tamdan sonra sonsuz rəqəmlər var.
Hazırda bunun 73 milyardı müəyyənləşib).
Məlumat üçün bildirək ki, "pi" ədədi
istənilən çevrənin uzunluğunun diametrə olan nisbətidir. Bu da 3.14.....
şəklində sonsuza qədər artan ədədlərdən ibarətdir. Bunu elmə gətirən
Arximed olub. Daha sonralar, yəni XIV əsrdə Şərq alimi Qiyasəddin Cəmşid
tamdan sonra gələn 14-cü rəqəmə kimi bunu tapıb.