Təhsilimizin ulduzları dünyada sayrışırlar

Hər il Təhsil Nazirliyi və “Çağ” Öyrətim İşlətmələri Şirkəti yeni dərs ilinin əvvəlində “Təhsilimizin ulduzları” adlı hesabat mərasimi keçirir.
Mərasimdə ölkəmizin təhsil sistemində özünəməxsus yeri olan “Çağ” Öyrətim İşlətmələri Şirkətinin təhsil müəssisələrinin tələbə adını qazanmış məzunların, beynəlxalq fənn olimpiadalarında yüksək nəticə əldə edərək ölkəmizə qızıl, gümüş, bürünc medallar gətirən şagirdlərin, həmçinin Prezident təqaüdünə layiq görülənlərin əməyi qiymətləndirilir. Ötən şənbə də Qafqaz Universitetində 2011-2012-ci dərs ilinə həsr edilmiş “Yüksələn təhsilimizin bayraqdarı - Azərbaycan məktəblisi” adlı təqdimetmə mərasimi keçirildi.
Ümummilli lider Heydər Əliyevin və Türkiyə Cümhuriyyətinin qurucusu Mustafa Kamal Atatürkün xatirəsi birdəqiqəlik sükutla yad edildikdən sonra Azərbaycanın və Türkiyənin dövlət himnləri oxundu. “Çağ”ın 20 illik fəaliyyəti ilə bağlı qısametrajlı filmin nümayişindən sonra bu və ya digər sahələr üzrə fərqlənmiş şagird və tələbələr səhnəyə dəvət olundular. Onlara mükafatları millət vəkilləri Kəmalə Əliyeva, Muxtar Babayev, Etibar Hüseynov, professor Şahlar Əsgərov, Azərbaycan Milli Elmlər Akademiyasının müxbir üzvü Vaqif Abbasov, Respublika Fizika Olimpiadası Təşkilat Komitəsinin sədri, professor Mirzəli Novruzov, kənd təsərrüfatı nazirinin müavini Bəhram Əliyev, dövlət miqrasiya xidmətinin sədr müavini Pərviz Musayev, “Çağ” Öyrətim İşlətmələri İdarə Heyətinin sədri Enver Özeren, Türkiyənin ölkəmizdəki səfiri İsmail Alper Coşkun və təhsil naziri prof. Misir Mərdanov təqdim etdilər.
Tədbirdə çıxış edən Qafqaz Universitetinin rektoru, professor Əhməd Saniç ulu öndər Heydər Əliyevin təhsilə daim böyük önəm verdiyini, müdrik şəxsiyyətin ideyalarının ölkə başçısı İlham Əliyev tərəfindən uğurla həyata keçirildiyini vurğuladı. Onun sözlərinə görə, son illər qəbul edilən sərəncamların üçdə biri təhsillə bağlı olub. O, Heydər Əliyev Fondunun prezidenti Mehriban xanım Əliyevanın da bu sahədəki rolunu xüsusi vurğuladı.
“Çağ” Öyrətim İşlətmələri İdarə Heyətinin sədri, dr. Enver Özeren bildirdi ki, “Çağ”ın əldə etdiyi uğurlar göz qabağındadır (Qeyd edək ki, “Çağ”ın şagirdləri beynəlxalq olimpiada yarışlarında 1994-cü ildən bu günə qədər 104 qızıl, 169 gümüş, 256 bürünc olmaqla 529  medal əldə ediblər). Onun sözlərinə görə, qazanılan müvəffəqiyyətlər “Çağ”a göstərilən etimada sədaqətlə çalışmağın nəticəsidir: “Azərbaycan Prezidentinin “Çağ” Öyrətim İşlətmələrinin fəaliyyətindən razılığı, fəaliyyətimizin daha da genişləndirilməsini istədiyini deməsi və “Çağ” Öyrətim İşlətmələri ümummilli liderin əmanətidir” deməsi hamımızın məsuliyyətini daha da artırır və üzərimizə çox böyük məsuliyyətlər qoyur”. O eyni zamanda təhsilimizin ulduzlarının dünyada sayrışdıqlarını da vurğuladı. Onun fikrincə, bu amil həm də diaspor fəaliyyətimizdə də önəmli rol oynayır. Bu yaxınlarda ABŞ-ın Texas ştatının Hyuston şəhərində türkdilli xalqların ənənəvi mədəniyyət tədbiri olan “İpək Yolu” festivalından danışan Enver bəy bildirdi ki, orada Azərbaycanın milli mədəniyyət nümunələri, qədim tarixi abidələrini özündə əks etdirən stendi 50 min amerikalı maraqla izləyib: “Yeri gəlmişkən, onu da deyim ki, həmin ölkədə minillikləri özündə yaşadan abidələr yoxdur”.
Türkiyənin ölkəmizdəki səfiri İsmail Alper Coşkun təhsildə fərqlənənlərin icitimaiyyətə bu şəkildə tanıdılmasını çox önəmli tədbir kimi xarakterizə etdi. Onun sözlərinə görə, dünyanın inkişafının təməlində təhsil dayanır. Bu mənada Azərbaycanın bu sahəyə önəm verməsi təqdirəlayiqdir. Daha sonra Azərbaycanda minlərlə Türkiyə vətəndaşının, Türkiyədə isə minlərlə azərbaycanlının təhsil aldığını vurğulayan səfir bu kimi əməkdaşlıqların daha da möhkəmlənəcəyini bildirib. O həmçinin iki ölkə arasındakı anlaşmalar arasında təhsillə bağlı anlaşmalara daha çox üstünlük verildiyini də vurğuladı.
Təhsil naziri prof. Misir Mərdanov belə bir tədbirdə iştirakından məmnun olduğunu dilə gətirdi: “Hər il “Çağ” bizə belə sevincli anlar yaşadır. Mən dəfələrlə demişəm, yenə deyirəm: “Çağ” Öyrətim İşlətmələrinin fəaliyyəti bütün təhsil müəssisələri üçün bir örnəkdir. Bu şirkətin Azərbaycan təhsilinin inkişafında xüsusi rolu olub. Bu şirkət Azərbaycan-Türkiyə arasında elə bir körpü salıb ki, o, ildən-ilə daha da möhkəmlənir, daha da genişlənir. Bu körpünün sonsuzluğadək genişlənəcəyinə əminəm”. O, “Çağ”ın keçdiyi 20 yolun ilk illərinin heç də asan olmadığını da dedi: “Amma çox şükürlər ki, “Çağ” öz fəaliyyəti ilə bir sıra ilklərə imza atmaqla Azərbaycanı, onun təhsilini beynəlxalq aləmdə, sözün həqiqi mənasında, tanıtdı”. O, bu kimi uğurlarda əməyi olan hər kəsə Təhsil Nazirliyi adından təşəkkür etdi.
Tədbirdə Qafqaz Universitetinin və Azərbaycan-Türkiyə özəl Liseylərinin özfəaliyyət kollektivi də maraqlı konsert proqramı ilə çıxış etdilər.
http://www.zaman.az/az/newsDetail_getNewsById.action?newsId=45415

Bu blogdaki popüler yayınlar

Azerbaijan - GOV - Azerbaijan to Host an International ICT Conference

Özəl və dövlət ali təhsil məktəbləri arasındakı fərq

VİCDAN SUSTUĞUNDA : Download PDF