Afərin, Orxan!
Bu il qəbul imtahanlarında ölkə üzrə 700 bal toplayan məzunlardan biri də Qazax rayonunun payına düşüb.700 bal toplayan Orxan Qafqaz Universitetində sənayenin təşkili və idarə olunması fakültəsinə daxil olub.
Təhsil
şöbəsinin geniş foyesində elə ilk baxışdan yaraşıqlı bir lövhə diqqəti
cəlb edir: "Əhsən, Orxan, biz səninlə fəxr edirik!" Başda qəbul
imtahanlarında 700 bal toplamış Orxan Səfərovun şəkli, sonra da
ayrı-ayrı təşkilatların, kollektivlərin, ziyalıların ürək sözləri. Hamı
bu gənc oğlanı bilik yarışındakı qələbə münasibəti ilə təbrik edir, ona
yeni uğurlar arzulayır. Axı Orxan Arif oğlu Səfərov cari ildə ölkə üzrə
700 bal toplamış beş nəfərdən biridir. Onun uğuruna bütün rayon əhsən
deyir. Hamı Orxanın istedadı ilə fəxr edir. Təhsil ocaqlarında söhbət
Orxandan gedir, onunla çox yerdə görüşlər keçirilib. Hara gedirsənsə, bu
bilikli, bacarıqlı gəncin uğurundan danışılır. Onu yetirən S.Nəsirov
adına məktəbdə və ümumən Ürkməzli kəndində isə neçə gündür əsl bayram
sevinci yaşanır.
Ürkməzli kəndinə getdik. Əskipara dərəsində bağlı-bağatlı bir məkanda
yerləşir. Yaşıllığı bol, havası saf, baxdıqca bir-birindən yaraşıqlı
mənzərələr göz oxşayır. Kənd məktəbində həqiqətən də bayramdır.
Müəllimlər, valideynlər, şagirdlər dəstə-dəstə gəlir, hamı Orxan
Səfərovun şəkli önündə ayaq saxlayır, deyir, gülür, haqqında xoş sözlər
danışır. İndi Orxan kənddə yoxdur. Bakıya gedib. Qafqaz Universitetində
sənayenin təşkili və idarə olunması fakültəsinə daxil olub.
Sədaqət Qurbanova Orxanın oxuduğu sinfin rəhbəri olub. Hamının başını ucaldan şagirdin haqqında həvəslə, ehtiramla danışır:
- Orxan adətən arxa stollardan birində oturar, sakit, səssiz-səmirsiz
öz işi ilə məşğul olardı. Bilirdik ki, o, hər fənni yaxşı mənimsəyir,
hər bir dərsə həmişə hazırdır. Lakin soruşmasan, irəli düşüb cavab
verməyə canfəşanlıq etməzdi. Heç vaxt görməmişdik ki, dərsə ləngisin,
şuluq salsın, kiminsə xətrinə dəysin.
Orxana dərs demiş müəllimlərdən Təranə Məmmədova, İlqar Miralıyev,
Xatirə Əyyubova, Sevda Məhərrəmova və başqaları Orxan haqqında
ağızdolusu danışır, hərəsi ibrətamiz bir xatirə söyləyir.
- Orxan ən çox hansı fənləri xoşlayırdı?
- Fərqləndirmək çətindir, - dedilər. - Orxan üçün elmdə yad sahə
yoxdur. Hər şeylə maraqlanır, hər şeyi bilirdi. Bununla yanaşı, ictimai
işlərdə də fəal iştirak edirdi. "Şahin" və "Sərhədçi" hərbi idman
oyunlarında, "Gənc xilasedici və yanğınsöndürən" yarışında, habelə
müxtəlif fənn olimpiadalarında Orxanın xüsusi xidməti olub. Ona görə də
dəfələrlə fəxri fərmanlara layiq görülüb.
Orxanın ailəsi ilə maraqlandıq. Atası taksi sürücüsü, anası isə evdar
qadındır. Arif Səfərov deyir ki, heç vaxt o, bizə məktəbdən qayğı
gətirməyib, həmişə haqqında xoş sözlər eşitmişik. Evdə də o, təsərrüfat
işlərində bizə yaxından kömək edərdi.
Onun böyüdüyü ocaq sadə kənd ailələrindən biridir. Halal zəhmətlə
dolanır. Elin, obanın içində nəzakətlə, hörmətlə davranırlar. Məhz belə
əməksevər ailədə iki oğul böyüyür. Böyüyü Elnur Səfərov keçən il 636 bal
toplayaraq Qafqaz Universitetinə daxil olub. Atası deyir ki, Elnur
Bakıya gedəndə biz, əlbəttə, narahat idik. Elə böyük şəhərdə baş aça
biləcəkmi? Onda Orxan qardaşının üzündən öpərək:
- Get, - dedi, - gələn il mən də gələcəyəm. Özü də birbaşa sənin oxuduğun məktəbə gələcəyəm.
Həqiqətən də belə oldu. Orxan ən yüksək balla Elnurun oxuduğu Qafqaz Universitetinin tələbəsi oldu.
Bu istedadlı gənclərin, bu sadə, işgüzar ailənin, bu
bilikli-bacarıqlı kənd məktəbinin haqqında ona görə bir qədər geniş
danışırıq ki, indi Ürkməzli məktəbi də, Səfərovlar ocağı da, onların
övladlarının həyatı da çoxuna əsl nümunədir.
Orxan Səfərovun uğuru sayalı oldu. Məktəbin geniş həyətində yeni bir
binanın təməli qoyulur. Təzəlikcə bünövrəsi qazılır. Qazax rayonunda
Orxan Səfərov tək deyildir. Ləman Qasımova, Kamran Məmmədov, Elnur
Əlizadə, Cəmilə Quliyeva, Günay Məzənova, Bəxtiyar Göyüşov və başqaları
600-dən çox bal toplayaraq ölkənin ən nüfuzlu ali məktəblərinə daxil
oldular. Ümumən isə cari ildə Qazaxdan 365 nəfər gənc oğlan və qız
tələbə biletini almışdır.
Gənc məzunların bu uğurları, əlbəttə, yeni nəslin inkişafına, elmə,
biliyə dövlət tərəfindən göstərilən tükənməz qayğının bəhrəsidir. Təhsil
şöbəsinin müdiri Əhməd Dərgahquliyev deyir ki, son illərdə regionların
sosial-iqtisadi inkişafı Dövlət Proqramı ilə əlaqədar olaraq yerlərdə
görülən geniş abadlıq-quruculuq işləri ilə yanaşı, təhsilin bazası da
getdikcə möhkəmlənir. Hər il bir-birindən yaraşıqlı, yeni-yeni obyektlər
tikilir. Şahmat məktəbinin və Birinci Şıxlı kənd tam orta məktəbinin
binalarının açılışında Prezident İlham Əliyevin iştirakı bu yerlər üçün
tarixi bir hadisə idi.
Respublika Prezidentinin "Qəza vəziyyətində olan ümumtəhsil
məktəblərinin yenidən qurulması ilə bağlı əlavə tədbirlər haqqında"
2009-cu il 4 dekabr tarixli sərəncamı ilə ölkənin hər yerində olduğu
kimi, Qazax rayonunda da sistemli surətdə məktəblərin siması dəyişilir.
Təkcə cari ildə şəhərdə 4 nömrəli orta məktəb üçün üçmərtəbəli yeni bina
tikilmiş, digər bir məktəbdə əlavə korpus inşa edilmişdir. Aslanbəyli,
Canallı və Qazaxbəyli kənd tam orta məktəblərində isə tikinti işləri
başa çatmaq üzrədir.
Qazax rayonunda olarkən onu da yəqin etdik ki, Orxan Səfərovun
nümunəsi rayonun bütün təhsil ocaqlarında təbliğ olunur, öyrənilir,
yayılır, dövlətin tükənməz qayğısı və köməyi sayəsində müstəqil
ölkəmizdə yüksək bilikli, bacarıqlı yeni nəsil yetişir.
Əhməd İSAYEV,
"Azərbaycan"