“Rüşvət və tapşırıq ifadələri universitetimizə yaddır”
Qafqaz Universitetinin rektoru Əhməd Saniç
(türkçə: Ahmet Saniç) Publika.Az-a müsahibə verib. Həmin müsahibəni
oxucuların diqqətinə çatdırırıq.
- Əhməd bəy, hər kəsə yaxşı bəllidir ki, Azərbaycanın özəl ali
təhsil müəssisələri arasında Qafqaz Universiteti verdiyi təhsil
keyfiyyətlərinə görə kifayət qədər seçilir və tanınır. Bunun sirrini
necə izah edərdiz?
- Bilirsiniz ki, Qafqaz Universiteti Azərbaycanda 1993-ci ildə
yaradılıb. Həqiqətən də Qafqaz Universiteti 1993-cü ildən bəri üzərinə
düşən işi layiqincə yerinə yetirməyi bacardı. Biz indiyədək
fəaliyyətimiz dövründə nə lazımdırsa etmişik. Hətta Aropanın aparıcı
təhsil müəssisələri də bizimlə partnyor olmağa səy göstərirlər. Qafqaz
Universitetinin fəaliyyəti dövründə minlərcə tələbəsi artıq məzun olub.
1993-cü ildə fəaliyyətə başlayan universitetimiz bu il mühəndislik
fakültəsindən 46, iqtisadiyyat və idarəetmə fakültəsindən 135, Pedaqoji
fakültəsində 146 və magistratura pilləsində isə 100 tələbə olmaqla cəmi
427 tələbəsini məzun verib. Hazırda həmin məzunlar dünyanın 57 ölkəsində
müxtəlif sahələrdə fəaliyyət göstərirlər. Onların arasında təhsillərini
davam etdirənlər də var.
Rüşvət və tapşırıq ifadələri unversitetimizə yaddır. Hətta bu
ifadələri burada kimsə dilinə gətirməyə belə utanır. Burada tələbə üçün
nə lazımdırsa, hamısını biz təmin etmişik və tələbədən istədyimiz təkcə
təhsildir.
Qafqaz Universitetinin məzunları təkcə Azərbaycanda deyil, həmçinin
Türkiyə və MDB ölkələrində də yüksək təhsilə yiyələnmələri ilə
tanınırlar. Bunun bariz nümunəsidir ki, Qafqaz Universitetində təkcə
Azərbaycandan deyil, eyni zamanda Türkiyə, MDB və dünyanın digər
ölkələrindən tələbələr təhsil alırlar. Qafqaz Unversitetinin məzunları
dövlətin bütün strukturlarında, o cümlədən özəl şirkətlərdə yüksək
vəzifələrdə çalışırlar. Hətta indi Qafqaz Universitetinin məzunlarını
işə götürən müxtəlif şirkətlər və qurumlar imtahansız işə qəbul edirlər.
Hazırda Qafqaz Universitetinin məzunlarının cəmi 2-3 faizi işsizdir.
Ona görə də Azərbaycanda ən yüksək bal toplayan gənclər Qafqaz
Universitetini seçirlər. Hazırda Qafqaz Universitetində təhsil alanların
dörddə biri 600-dən çox bal toplayan tələbələrdir və bu aşağı göstərici
deyil.
Qafqaz Universitetinin təlim-tədris bazası da ən müassir
formadadır. Hətta bizim tədris bazamız Türkiyənin aparıcı
unversitetlərinin bazasından da mükəmməldir. Unversitetimizin tələbələri
xaricdə də təcrübə keçirlər. Onlar ən müassir bacarıqlara yiyələnirlər.
Əlbəttə ki, bütün bunlar bizi çox sevindirir və işimizə məsuliyyətimizi
və sevgimizi daha da artırır. Artıq biz öz tələbələrimizi “Nobel
mükafatı” almağa hazırlayırıq. Çünki, Qafqaz Universitetinin tələbələri
daha da çox elm və təhsili öyrənməyin öhdəsindən gəlməyi bacarır. Hətta
Qafqaz Universitetinə 300-400 balla qəbul olmuş tələbələr məzun olandan
sonra ölkənin ən təcrübəli və bacarıqlı kadrlarına çevrilirlər.
Çox sevinirik ki, Azərbaycan dövlətinin və xalqının bizə olan
etimadını doğrulda bilmişik. Biz bu etimada qarşılıq olaraq sədaqətlə və
daha da inamla çalışmağı davam etdiririk.
- Qafqaz Universitetində distant təhsil sisteminin həyata keçirilməsinə nə vaxt başlanılacaq?
- Hazırda Qafqaz Universiteti distant təhsil də həyata keçirməyə
tam hazırdır. Bunun üçün unversitetin həm tədris bazası, həm də texniki
imkanları yaradılıb. Azərbaycanda distant təhsillə bağlı qanun qəbul
edilən kimi Qafqaz Universiteti bu sahədə də fəaliyyətə başlayacaq.
Ümumiyyətlə isə, elə insanlar var ki, onlar aldıqları təhsildən və
ya ixtisaslarından narazıdırlar. Yaxud da bəzi insanlar, xüsusilədə hər
hansı işdə çalışan adamlar karyeralarını daha da zənginləşdirmək
arzusundadırlar. Onların hər gün təhsil müəssislərinə getməyə vaxtları
olmur. Belə olan təqdirdə, həmin insanların arzularının reallaşması üçün
distant təhsil yeni imkanlar yaradır. Bu baxımdan da mən inkişaf etmiş
ölkələrdə geniş yayılmış distant təhsilin olmasını çox yaxşı
qiymətləndirirəm.
- Bütövlükdə, Azərbaycanda təhsilin səviyyəsini necə qiymətləndirərdiz?
- Azərbaycan hökuməti ölkədə təhsilin inkişafına son dərəcə böyük
önəm verir. Təhsil naziri Misir Mərdanovun da dediyi kimi, Azərbaycanda
10 il bundan əvvəl mövcud olan təhsil müəssisələri ilə indiki təhsil
müəssisələri arasında fərq çox böyükdür. Mən Azərbaycana 2005-ci ildə
gələn zaman Azərbaycanın təhsil sistemində hələ bolonya mövcud deyil
idi. Amma artıq Azərbaycan təhsil sistemində də bolonyaya keçilib. Digər
tərəfdən isə qeyd edə bilərəm ki, Azərbaycanda dövlət səviyyəsində
təhsilin inkişafı üçün siyasət həyata keçirilir. Son illər Azərbaycan
təhsilinin inkişafı da məhz buradan qaynaqlanır.
Həsən Həsənov
