"Çağ" Öyrətim Şirkəti ötən dərs ilində fərqlənmiş şagird, müdavim və tələbələri mükafatlandırdı

Oktyabrın 20-də Qafqaz Universitetində "Çağ" Öyrətim İşlətmələri Şirkətinin liseylərinin, "Araz" hazırlıq kurslarının və Qafqaz Universitetinin ötən dərs ilində respublika və beynəlxalq olimpiadalarında, müsabiqələrində uğurlu nəticələr əldə etmiş, ali məktəblərə qəbul imtahanlarında yüksək bal toplamış şagird, müdavim və tələbələrinin mükafatlandırılması mərasimi keçirildi.
Ənənəvi olaraq "Yüksələn təhsilimizin bayraqdarı - Azərbaycan məktəblisi" devizi altında keçirilən "Təhsilimizin ulduzları" adlı mükafatlandırma mərasimində müxtəlif dövlət və hökumət qurumlarının rəsmiləri, Milli Məclisin deputatları, ölkənin bir sıra orta və ali məktəblərindən nümayəndələr, valideynlər, iş dünyası və KİV təmsilçiləri iştirak edirdilər.
Mərasim açıq elan olunduqdan sonra ulu öndər Heydər Əliyevin, ölkəmizin müstəqilliyi uğrunda mübarizədə şəhid olmuş Vətən övladlarının xatirəsi bir dəqiqəlik sükutla yad olundu, Azərbaycanın Dövlət himni səsləndirildi.
Proqram bu yaxınlarda 20 illiyi qeyd olunacaq "Çağ" Öyrətim İşlətmələri Şirkətinin ölkəmizdəki fəaliyyətini əks etdirən filmin nümayişi ilə başladı. Sonra Qafqaz Universitetinin rektoru, professor Ahmet Saniç çıxış edərək qonaqları və mərasimin digər iştirakçılarını salamladı, onları "Çağ" Öyrətim Şirkətinin bir növ illik hesabatı hesab olunan "Təhsilimizin ulduzları" proqramında görməsindən məmnunluq duyduqlarını bildirdi. Qeyd etdi ki, hər bir millətin gələcəyi olan təhsilə ölkəmizdə böyük diqqət və qayğı göstərilir. Azərbaycan Respublikasının Prezidenti cənab İlham Əliyevin rəhbərliyi altında son illər ölkəmizdə təhsilin inkişafı sahəsində mühüm işlər görülmüş, xeyli uğurlar əldə olunmuşdur. Yeni tikilmiş və ya təmir olunaraq yenidən qurulmuş, müasir texniki avadanlıqlarla təchiz olunmuş modern məktəb binaları, məktəblərdə hər şagirdə düşən kompüter sayının artması, ölkənin bütün ali məktəblərinin Boloniya prosesinə qoşulması və kredit sistemi ilə işləməsi, minlərlə tələbənin dövlət xətti ilə xarici ölkə universitetlərində, on minlərlə tələbənin isə dövlət sifarişi ilə Azərbaycanın ali məktəblərində təqaüd alaraq oxuması təhsilə göstərilən diqqət və qayğıya bariz nümunədir. Bütün bunlar həm də qara qızılın insan kapitalına çevrilməsi ilə bağlı ölkə başçısının məlum tezisinin uğurla həyata keçirilməsi deməkdir.
A.Saniç Türkiyə-Azərbaycan qardaşlığını daha da möhkəmləndirmək və Azərbaycanın təhsil sisteminə yenilik gətirmək məqsədi ilə Türkiyənin iş adamları tərəfindən qurulmuş "Çağ" Öyrətim Şirkətinin ümummilli lider Heydər Əliyevin göstərmiş olduğu etimada sədaqətlə 20 ildir ki, Azərbaycana xidmət etdiyini diqqətə çatdırdı. Bildirdi ki, şirkətin təhsil müəssisələrində təhsilini tamamlamış şagird və tələbələr hazırda həm ölkə daxilində, həm də xaricdə Azərbaycanın bir ulduz kimi parlaması üçün var qüvvələri ilə çalışırlar.
Rektor çıxışının sonunda "Təhsilimizin ulduzları" növbəti ənənəvi mərasimində kimlərin mükafatlandırılacağı haqqında məlumat verib, qonaqlara dəvəti qəbul edib gəldikləri üçün təşəkkür etdi.
Sonra respublika və beynəlxalq fənn olimpiadalarında, müsabiqələrində, layihə yarışmalarında mükafata layiq yerlər tutaraq medallar almış, orta təhsilini qızıl və gümüş medallarla başa vurmuş, qəbul imtahanlarında 600-dən yüksək bal toplamış, Prezident təqaüdünə layiq görülmüş şagird, müdavim və tələbələr qrup-qrup səhnəyə dəvət olunaraq onlara mükafatlar təqdim olundu.
Məlumat üçün bildirək ki, fənn olimpiadalarında I, II və III yerləri tutanlar müvafiq olaraq 1000, 1500 və 2000, qəbul imtahanlarında 600-dən yüksək bal toplayanlar isə 400, 600, 1000 və 3000 ABŞ dolları həcmində pul mükafatları və sertifikatlarla mükafatlandırılmışlar.
Fərqlənmiş şagird, müdavim və tələbələrə mükafatları Azərbaycan Respublikasının təhsil naziri Misir Mərdanov, Türkiyənin ölkəmizdəki fövqəladə və səlahiyyətli səfiri İsmayıl Alpər Coşqun, Milli Məclisin deputatları Kəmalə Əliyeva, Etibar Hüseynov, Muxtar Babayev, "Çağ" Öyrətim İşlətmələri Şirkəti İdarə Heyətinin sədri Ənvər Özərən, respublika kimya olimpiadası münsiflər heyətinin sədri, AMEA-nın müxbir üzvü, professor Vaqif Abbasov, respublika fizika olimpiadası münsiflər heyətinin sədri, professor Mirzəli Murquzov, kənd təsərrüfatı nazirinin müavini Bəhram Əliyev, Dövlət Miqrasiya Xidmətinin sədr müavini Pərviz Musayev, Azərbaycan Turizm İnstitutunun rektoru, professor Cəfər Cəfərov və başqaları təqdim etdilər.
Təqdimat mərasimində çıxış edən təhsil naziri Misir Mərdanov iştirakçıları salamlayaraq mükafatlandırılanları təbrik etdi. Tədbirdə sevincli anlar yaşadıqlarını vurğulayan təhsil naziri bu sevincin onlarda Azərbaycanın gələcəyi olan gəncləri təbrik etməkdən, onlarla birbaşa tanışlıqdan, "Çağ" Öyrətim Şirkətinin təhsil müəssisələrinin daha bir uğurunun şahidi olduqlarından yana yarandığını bildirdi. Nazir keçirilən tədbiri yüksək qiymətləndirib onun təşkilatçılarına təşəkkür etdi.
"Çağ" Öyrətim Şirkətinin ölkəmizdəki fəaliyyətinə toxunan Misir Mərdanov şirkətin ona ulu öndər Heydər Əliyev tərəfindən verilmiş etimadı sədaqətlə doğrultduğunu, ölkəmizdə fəaliyyət göstərdiyi 20 ildə Azərbaycan təhsilinin inkişafına böyük töhfələr verdiyini, təhsil sahəsində uğurlu islahatların həyata keçirilməsində onun təhsil müəssisələrinin örnək rolu oynadığını diqqətə çatdırdı və bütün bunlara görə şirkətin əməkdaşlarına təşəkkür etdi.
Azərbaycanın xalq yazıçısı  İlyas Əfəndiyevin "Körpüsalanlar" əsərini xatırladan təhsil naziri "Çağ" Öyrətim Şirkətinin əməkdaşları ilə Azərbaycan təhsil işçilərinin 20 illik birgə fəaliyyətini onunla müqayisə edərək həqiqətən 20 il ərzində bu insanların böyük zəhməti və əzmkarlığı hesabına bir millət  iki dövlət arasında uzun müddət sındırılmış körpünün təzədən bərpa edildiyini bildirdi və gələcəkdə bu körpünün daha geniş olacağına inamını ifadə etdi.
Tədbirdə Türkiyənin ölkəmizdəki səfiri İsmayıl Alper Coşqun və Ənvər Özərən də çıxış edərək mükafatlandırılanları təbrik etdilər.
Mərasimdə habelə fərqlənmiş şagird, müdavim və tələbələrin təhsil aldıqları tam orta məktəblərin direktorlarına plaketlər təqdim olundu.
"Tələbə baharı" festivalı və X Beynəlxalq Türk dili müsabiqəsinin mahnı nominasiyası üzrə qalibləri olan şagird və tələbələr öz çıxışları ilə mükafatlandırma mərasimini daha da rövnəqləndirdilər.
Sonda qaliblərlə xatirə şəkli çəkdirildi. 
Yusif ƏLİYEV

Bu blogdaki popüler yayınlar

Azerbaijan - GOV - Azerbaijan to Host an International ICT Conference

Özəl və dövlət ali təhsil məktəbləri arasındakı fərq

VİCDAN SUSTUĞUNDA : Download PDF