870 yaşı Qafqazda qeyd olundu
Qafqaz Universitetində böyük şərq mütəffəkiri, dahi Azərbaycan şairi
Nizami Gəncəvinin anadan olmasının 870 illik yubileyi ilə bağlı tədbir
keçirilib. SİA-nın xəbərinə görə, universitetin tələbə və
professor-müəllim heyəti, eyni zamanda, dəvətolunmuş qonaqlar bu
tədbirdə iştirak edibər.
Könül Kamilqızı
Tədbirdə Nizami Gəncəvinin böyüklüyü, onun ideya-estetik zövqü,
şərq ədəbiyyatında mövqeyi və s. barədə çıxışlar edilib. Açılış sözü ilə
çıxış edən Qafqaz Universitetinin Azərbaycan dili və Ədəbiyyatı
müəllimliyi bölməsinin müdiri prof. Akif Hüseynli Nizami Gəncəvi
yaradıcılığından geniş söz açaraq tələbələrə məlumat verib. Professor
Akif Hüseynli bildirdi ki, Nizami Gəncəvi tək Azərbaycanın deyil, o eyni
zamanda dünya şairidir.
Daha sonra isə söz məruzəçilərə verilib. Çıxış edənlər sırasında
AMEA-nın aparıcı elmi işçisi filologiya üzrə fəlsəfə doktoru Siracəddin
Hacı, AMEA-nın Folklor İnstitutunun şöbə müdiri filologiya üzrə fəlsəfə
doktoru Ağaverdi Xəlil, Qafqaz Universitetinin Azərbaycan dili və
Ədəbiyyatı müəllimliyi bölməsinin II kurs magistr tələbəsi Aygün Əliyeva
Nizami irsinin müxtəlif istiqamətlərində fikirlər söyləyiblər.
Sonda natiqlər tələbələri maraqlandıran sualları cavablandırıblar.
