Xocalı-sizlayan yaddaşımız
Fevralın
22-də Qafqaz Universitetində Mədəniyyət şöbəsinin təşkilatçılığı ilə
Xocalı faciəsinin 20-ci ildönümü anıldı.
Anma mərasiminin iştirakçıları
Azərbaycanın azadlığı, müstəqilliyi və ərazi bütövlüyü uğrunda
döyüşlərdə şəhid olan Vətən övladlarının və Xocalı şəhərində qətlə
yetirilən insanların xatirəsini bir dəqiqəlik sükutla yad etdilər.
Tədbirdə iştirak edən millət vəkili Aydın Mirzəzadə xalqımızın qan
yaddaşına həkk olunan o acı günün, Xocalı faciəsinin baş vermə
səbəblərini təhlil etdi. “Bəlkə də burada söylədiklərimi dəfələrlə
eşitmisiniz. Aramızda elə bir insan yoxdur ki, bu hadisələrdə itgisi
olmasın. Xocalıda həlak olanlar bizim ata-analarımız, qardaş və
bacılarımızdır. Bu mərasimlər ona görə keçirilir ki, gənclərimiz
xalqımıza qarşı törədilən qəddarlığı, amansızlığı unutmasınlar” sözləri
ilə gənclərə müraciətl edərək, mərasim iştirakçılarına soyqırım aktının
bir sıra dünya ölkələrində anıldığını bildirdi.
Dram dərnəyi üzvlərinin
ifasında təqdim olunan “Xocalı -sızlayan yaddaşımız” adlı ədəbi-bədii
kompozisiyada sənədli kadrların müşayiəti ilə bu soyqırımın bütün
bəşəriyyətə qarşı yönəlmiş cinayət olduğu vurğulandı. Xocalıda dinc
əhalinin milli, etnik zəmində məhv edildiyindən ürəkağrısı ilə bəhs
edildi. Mərasimdə “Vətən” adlı bir tarix kitabının Xocalı faciəsi
səhifəsi bir daha oxundu.
Lakin bu tarix kitabına daha bir səhifənin-
Azərbaycan xalqının igidliyi, qəhrəmanlığı və mərdliyi səhifəsi
yazılacağını inamla səsləndirən gənclər “Unutmadıq, Xocalı, Səninləyik”
bədii tərtibatını Türkiyə Cumhuriyyəti və Azərbaycan Respublikasının
dövlət bayraqlarını səhnəyə gətirməklə tamamlayaraq, əsrlər boyu türk
millətinin heç vaxt təslim olmadığını vurğuladılar.
