Təmsilçimiz 3-cü Sənaye Şurasında faydalı görüşlər keçirib

Xəbər verdiyimiz kimi, Türkiyənin paytaxtı Ankara şəhərində “2023-ə 10 qala” adı ilə 3-cü Sənaye Şurasının toplantısı keçirilib. Toplantıda ölkənin baş naziri, nazirləri, universitet rektorları, elm adamları, sənayeçilər, texnopark rəhbərləri, dövlət məmurları və qeyri-hökumət təşkilatlarının nümayəndələrinin birgə müzakirələr apardığı III Sənaye Şurasında bütün tərəflər Türkiyənin 2023-cü il hədəflərinə aparacaq yolları araşdırdılar.

265 Şura üzvü, 1600 içtirakçının təmsil olunduğu Sənaye Şurasında Türkiyənin sənaye gücünün artırılması, eləcə də ixrac potensialının çoxaldılması yolları birlikdə müzakirə olunub. 3 gün davam edən Sənaye Şurasında alınan tövsiyə qərarları və şurada təqdim olunan elmi məqalələr birlikdə kitab halında çap olunaraq istifadəyə veriləcəkdir. Xatırladaq ki, 3-cü Sənaye Şurasında Azərbaycandan Qafqaz Universiteti Texnoparkının müdiri dos. İsa Qasımov da iştirak edib. İ. Qasımov Sənaye Şurasında “Azərbaycanda Universitet - İş dünyası əlaqələrinin mövcud vəziyyətinin təhlili” adlı elmi məqalə ilə çıxış edib. İ. Qasımov 3-cü Sənaye Şurasında təcrübə mübadiləsi ilə yanaşı, texnoparkların Azərbaycanda inkişaf etdirilməsində faydalı ola biləcək tanışlıq görüşləri də keçirib.