X Beynəlxalq Türk- dili Olimpiadasının təqdimat mərasimi keçirildi- FOTO
Bakı
Özəl Türk liseyində X Beynəlxalq Türk - dili olimpiadasında iştirak
etmiş Azərbaycan komandasının qazandığı naliyyətlərin ictimaiyyətə və
medyaya təqdimat mərasimi keçirildi.
Tədbir Azərbaycan-Türkiyə Özəl Liseylərinin baş idarə rəisi Mesut
Kurnazın çıxışı ilə başladı. Mesut Kurnaz bildirdi ki, Beynəlxalq Türk
Dili Olimpiadası 2003-cü ildən etibarən Türkiyədə keçirilir və
Beynəlxalq Türk Dili Olimpiadasının məqsədi türk dilinin - türk dilləri
qrupuna daxil olan dillərin bütün dünyada əhatəli şəkildə tanınmasına və
yayılmasına nail olmaqdır. Bu olimpiada hər zaman beynəlxalq arenada da
medianın və ictimaiyyətin diqqət mərkəzindədir.
Mesut Kurnaz çıxışında bu il 135 ölkədən 1500 şagirdin iştirakı ilə
10-cu yubiley Beynəlxalq Türk Dili Olimpiadasının final mərhələsi 30 may
- 14 iyun 2012-ci il tarixlərində Türkiyənin 45 müxtəlif şəhərində 67
proqram təşkil olunduğunu, O cümlədən İzmir Atatürk stadionunda 200 min
nəfər tamaşaçının iştirakı və Olimpiadanın rəsmi bağlanma mərasimi
İstanbul Türk Telekom stadionunda 100 min nəfər tamaşaçının iştirakı ilə
təşkil olunduğunu söylədi.
X
beynəlxalq Türk-dili Olimpiadası ilə bağlı Türkiyə mətbuatında 2521
xəbər yayınlandı və bu da Türkiyənin tarixində yeni rekord olaraq
yazıldı. Həmçinin Türkiyənin 45 televiziya kanalının müxtəlif
proqramlarında olimpiadanın gedişatı işıqlandırıldı.
Onu da qeyd edək ki, Türkiyə Cümhuriyyətinin prezidenti Abdullah Gül Olimpiada iştirakçılarını Prezident İqamətgahında qəbul edib.
Bu il İstanbul Sərgi Mərkəzində təşkil olunmuş sərgidə ən böyük stend
Azərbaycana ayrılmışdı. Eyni zamanda proqram çərçivəsində bir çox dövlət
adamlarının və rəsmilərin də iştirak etdiyi xüsusi Azərbaycan şənliyi
keçirildi. Azərbaycanlı şagirdlər öz məharətlərini və Azərbaycan
mədəniyyətini yüksək səviyyədə nümayiş etdirdikləri proqramdan qonaqlar
böyük məmnunluq hissi ilə ayrıldılar. Olimpiadanın final mərhələsi
Türkiyənin Baş Naziri Recep Tayyip Erdoğanın iştirakı ilə keçirildi.
Türk dili olimpiadası yazı, danışıq, qrammatika, mahnı, şeir, xüsusi
istedad, xalq rəqsləri və digər nominasiyaları əhatə edib.
Bakı Özəl Türk liseyində keçirilən təqdimat mərasimində YAP
İdarə Heyətinin üzvü, partiyanın Səbail Rayon Təşkilatının sədri,
professor Zahid Qaralov, Milli Televiziya və Radio Şurasının sədri
Nuşirəvan Məhərrəmli və Millət vəkili Azər Badamov iştirak edib.
“Çağ” Öyrətim Şirkətinin İdarə Heyətinin sədri Enver Özeren öz
çıxışında Azərbaycanın tanıtım stendinin də qızıl medala layiq
görüldüyünü deyib. Daha sonra o bildirib: “Bu olimpiadanın əhatə dairəsi
ildən-ilə genişlənir. Əgər 10 il əvvəl bu tədbirə 17 ölkə qatılmışdısa,
2012-ci ildə onların sayı 135 oldu. Bu gün 150 ölkədə Türkiyənin
məktəbləri fəaliyyət göstərir. Sevindirici hal odur ki, bu məktəblərin
birincisinin xeyir-duasını ümummilli lider Heydər Əliyev verib. Bu
mənada deyə bilərəm ki, bu təntənənin əsası Azərbaycanda qurulub”.
Olimpiadada bu il Azərbaycanı təmsil edən şagirdlərimiz 14 kateqoriya
üzrə 13 qızıl, 10 gümüş və 3 bürünc medal qazanmışlar.
10 il müddətində isə Azərbaycanı təmsil edən şagirdlərimiz 35 qızıl, 48 gümüş, 20 bürünc medal əldə ediblər.
