İyunun 22-də Qafqaz Universitetində əmək sərgisi başlayır
“Azərbaycan Respublikası sürətli və dinamik
sosial-iqtisadi inkişaf yolundadır. Belə bir inkişaf strategiyası yaxın
gələcəkdə ölkəmizi sürətli inkişaf edən ölkələr sırasından inkişaf
etmiş ölkələr sırasına qoşulmasını təmin edəcəkdir.
Bütün sahələrdə baş verən sosial-iqtisadi
inkişaf yeni müəssisələrin meydana gəlməsi və müxtəif sektorlarda iş
yerlərinin açılması ilə nəticələnir. Belə bir dinamikada səmərəli rol
almaq üçün bütün imkanlarını səfərbər edən Qafqaz Universiteti iş
dünyası ilə birgə çoxsahəli fəaliyyətlər həyata keçirməkdədir. Bu cür
fəaliyyətlərdən biri də ənənəvi olaraq, hər il keçirdiyimiz Əmək
Sərgiləridir”. Bu fikirlər Qafqaz Universitetinin mətbuat xidmətinin
dünən yaydığı məlumatda öz əksini tapıb. Məlumatda həmçinin deyilir ki,
iyunun 22-də Əmək və Əhalinin Sosial Müdafiəsi Nazirliyi ilə Qafqaz
Universitetinin birgə təşkil edəcəyi “Karyerada İlk Addım” adlı əmək
sərgisində dövlət və özəl sektora aid 100-dən çox təşkilatın iştirak
edəcəyi gözlənilir: “Bütün məzun və tələbələri “Karyerada İlk Addım”
adlı əmək yarmarkasında iştirak etməyə dəvət edirik”. Xatırladaq ki,
keçən tədris ilində universitetin keçirdiyi Əmək Sərgisində 100-dək
şirkət və müəssisə iştirak edib. Həmin təşkilatlar ümumilikdə 700-dək
vakant iş yerinə namizəd axtarıb.
http://zaman.az/az/newsDetail_getNewsById.action?newsId=43884
