Qafqaz Universitetində aktiv məşğulluq tədbiri keçirilib
AZADİNFORM. Əmək və Əhalinin Sosial Müdafiəsi Nazirliyi yanında
Dövlət Məşğulluq Xidməti tələbə və məzunların əmək bazarına
inteqrasiyası məqsədilə “Karyerada ilk addım” devizi altında növbəti
aktiv məşğulluq tədbirini Qafqaz Universitetində keçirib. Məlumatı
“Azadinform”a Əmək və Əhalinin Sosial Müdafiəsi Nazirliyinin
ictimaiyyətlə əlaqələr şöbəsindən veriblər.
Əmək və əhalinin sosial müdafiəsi naziri Fizuli Ələkbərov və
Qafqaz Universitetinin rektoru, professor Ahmet Saniç tədbirin
açılışında iştirak edib, təşkilati vəziyyəti, təqdim olunan boş iş
yerləri, onların tələbə və məzunların aldıqları ixtisaslar və gələcək
karyeraları baxımından münasib olması və s. ilə tanış olub, tədbirdə
iştirak edən işəgötürənlər, həmçinin tələbə və məzunların tədbir barədə
fikir və rəylərini öyrəniblər.
KİV-ə müsahibəsində nazir F.Ələkbərov son illərdə aktiv məşğulluq
tədbirlərinin artıq ənənə halını aldığını və bu tədbirlərin müsbət
nəticələr verdiyini, hər il yalnız belə tədbirlər nəticəsində 600-700
gəncin münasib iş yerləri ilə təmin olunduğunu qeyd edib. Nazir bildirib
ki, gənclərin malik olduqları qabiliyyət və bacarıqlarını cəmiyyətə
təqdim edə bilməsi onların gələcək karyerasının inkişafı üçün vacib
şərtlərdən biridir. Onun sözlərinə görə, belə aktiv məşğulluq tədbirləri
bütün ali təhsil müəssisələrində təşkil olunacaq.
Qeyd edək ki, tədbirdə 79 müəssisə və təşkilat tərəfindən 687 boş iş
yeri təqdim olunub. Həmin müəssisələrdən 9-u dövlət, 70-i qeyri-dövlət
müəssisələridir. 2008-ci ildən başlayaraq Qafqaz Universitetində
“Karyerada ilk addım” devizi altında keçirilən aktiv məşğulluq
tədbirlərində ümumilikdə 301 müəssisə tərəfindən tələbə və məzunların
seçiminə 2721 boş vakant iş yeri təqdim edilib. Tədbirlərdə iştirak
etmiş tələbə və məzunlardan 622 nəfərə göndəriş verilib, 246 nəfər
münasib işlə təmin edilib. Ümumilikdə, Bakı şəhəri üzrə bu vaxtadək
“Karyerada ilk addım” devizi altında keçirilmiş aktiv məşğulluq
tədbirlərində 1241 işəgötürən təşkilat tərəfindən 7915 boş vakant iş
yeri təqdim olunub. Tədbirlərdə iştirak edənlərdən 2338 nəfərə
göndəriş verilib, 1175 nəfər münasib işlə təmin edilib.
http://www.azadinform.az/news/a-24142.html
