O gecə hamı kövrəlmişdi
Lənkəran Özəl Türk Liseyində 28 may Respublika
Gününə və “Çağ” Öyrətim Şirkətinin fəaliyyətinin 20 illiyinə həsr
edilmiş buraxılış gecəsi keçirilib.
Tədbirdə Heydər Əliyev və Mustafa Kamal
Atatürkün, eləcə də Türkiyə və Azərbaycanın müstəqilliyi uğrunda şəhid
olmuş insanların xatirəsi bir dəqiqəlik sükutla yad edilib. Daha sonra
Azərbaycan və Tükiyənin dövlət himnləri oxunub. “Çağ” Öyrətim
İşlətmələri Şirkətinin 20 illik fəaliyyətini özündə əks etdirən filmin
nümayişindən sonra cari tədris ilində beynəlxalq və respublika fənn
olimpiadalarında yer tutmuş şagirdlərə hədiyyələri təqdim etmək üçün
Lənkəran Şəhər İcra Hakimiyyətinin nümayəndəsi Tahir Zülfüqarov səhnəyə
dəvət olunub. Qalibləri və məzunları təbrik edən T. Zülfüqarov Lənkəran
Özəl Türk liseyinin fəaliyyətini yaxından izlədiklərini, onlara hər
zaman rayon rəhbərliyi səviyyəsində qayğı göstərildiyini və bundan sonra
da hər zaman yanlarında olacaqlarını vurğulayıb.
Azərbaycan-Türkiyə Özəl Liseyləri Baş İdarəsinin rəis müavini Ayhan
Sipahi öz çıxışında bu təhsil ocaqlarının 20 il əvvəl ulu öndər Heydər
Əliyevin xeyir-duası ilə fəaliyyətə başladığını söyləyib. O, “Çağ”ın
həmişə etimada sədaqətlə xidmət etdiyini vurğulayıb. A. Sipahi liseyi
bitirən hər bir məzunun uğur qazanacağına inandığını dilə gətirib.
Qafqaz Universitetinin kompyuter mühəndisliyi bölməsinin kafedra müdiri
Abzəddin Adamov da məzunlara uğurlar arzulayıb.
Tədbirin sonunda liseyin müdiri Rüfət Əliyev məzunlara xatirə
kitablarını təqdim edib sağollaşarkən duyğulu anlar yaşanıb, hətta bəzi
məzunlar göz yaşlarını da saxlaya bilməyiblər. Tədbir çərçivəsində
nümayiş etdirilən bədii proqram da maraqla izlənilib.
Bu tədbirdən sonra həmsöhbət olduğumuz valideynlərdən biri - Vidadi
Mirzəyev övladının belə bir liseydə təhsil aldığı üçün qürur duyduğunu
dilə gətirib: “Bu lisey regionumuzda lider təhsil ocağıdır”. Bu ilin
məzunu Sabir Mirzəzadə isə öz duyğularını bu şəkildə dilə gətirib:
“Arzum budur ki, bütün məzunlarımız bu təhsil ocağında öyrəndiklərini,
sahib olduqları dəyərləri heç vaxt unutmasınlar, harada olmalarından
asılı olmayaraq həmin dəyərləri yaşatmağa çalışsınlar”.
Özəl Türk Liseyinin müdiri Rüfət Əliyev isə ona ünvanladığımız
sualları belə cavablandırdı: -1993-cü ildən fəaliyyətə başlayan Lənkəran
Özəl Türk liseyi ötən 19 ildə bir çox nailiyyətləri ilə yadda qalıb.
Belə ki, liseyin şagirdləri beynəlxalq və respublika fənn
olimpiadalarda, qızıl, gümüş və bürünc olmaqla, ümumilikdə 156 medal
qazanıblar. Artıq liseyimiz 6-cı məzunlarını yola salır.
