Bakıda “İnformasiya və kommunikasiya texnologiyalarının tətbiqi” mövzusunda 5-ci beynəlxalq konfrans keçirilir




Bakı, 12 oktyabr (AzərTAc). Qafqaz Universitetində “İnformasiya və kommunikasiya texnologiyalarının (İKT) tətbiqi” mövzusunda 5-ci beynəlxalq konfrans keçirilir.
AzərTAc xəbər verir ki, konfrans Təhsil, Rabitə və İnformasiya Texnologiyaları nazirlikləri, Qafqaz Universiteti, Bakı Dövlət Universiteti (BDU), AMEA-nın İnformasiya Texnologiyaları İnstitutu, YUNESKO Təhsildə İnformasiya Texnologiyaları İnstitutu, Daşkənd İnformasiya Texnologiyaları Universiteti, Türkiyə Əməkdaşlıq və İnkişaf Agentliyi (TIKA) və IEEE- (Elektrik və Elektronika Mühəndisləri İnstitutu) tərəfindən təşkil olunmuşdur.
Dünyanın müxtəlif ölkələrindən (Azərbaycan, Türkiyə, Rusiya, Özbəkistan, Qazaxıstan və s.) alim və mütəxəssislərin qatıldığı beynəlxalq tədbir “Azercell-Telekom” MMC və digər qurumların dəstəyi ilə keçirilir.
Açılış mərasimində Qafqaz Universitetinin rektoru, professor Əhməd Saniç konfransın əhəmiyyətini vurğulamışdır.
Rabitə və informasiya texnologiyaları nazirinin müavini Elmir Vəlizadə, BDU-nun rektoru, Milli Məclisin deputatı, akademik Abel Məhərrəmov, Azərbaycan Milli Elmlər Akademiyası İnformasiya Texnologiyaları İnstitutunun direktoru, AMEA-nın müxbir üzvü Rasim Əliquliyev, Daşkənd İnformasiya Texnologiyaları Universitetinin rektoru, professor Hakim Muhitdinov müasir dünyada informasiya-kommunikasiya texnologiyalarının və onun müvafiq sahələrdə tətbiqinin mühüm rolundan danışmışlar.
Sonra mövzu üzrə geniş təqdimatlar olmuşdur.
Konfransda “İnformasiya elmləri və tətbiqi”, “İKT-nin humanitar və ictimai elmlərdə tətbiqi”, “İKT-nin elm, təhsil və tədqiqatlarda tətbiqi”, “İKT-nin tibb və səhiyyədə tətbiqi”, “İKT-nin dövlət və idarəçilikdə tətbiqi”, “İKT-nin biznes, idarəetmə və iqtisadiyyatda tətbiqi” mövzuları üzrə məruzələr dinləniləcək, geniş müzakirələr aparılacaqdır.
Oktyabrın 14-də başa çatacaq beynəlxalq konfransa dünyanın 31 ölkəsindən 250 dən çox məqalə daxil olmuşdur.

Bu blogdaki popüler yayınlar

Azerbaijan - GOV - Azerbaijan to Host an International ICT Conference

Özəl və dövlət ali təhsil məktəbləri arasındakı fərq

VİCDAN SUSTUĞUNDA : Download PDF