Türkiyə Cümhuriyyətinin Böyük Millət Məclisi sədrinin 1-ci müavini Bakı Özəl Türk Liseyində olub
Martın 16-da Türkiyə Cümhuriyyətinin sabiq Təhsil Naziri və Böyük
Millət Məclisi sədrinin 1-ci müavini Mehmet Sağlam Bakı Özəl Türk
Liseyində olub. Görüşdə “Çağ” Öyrətim İşlətmələri İdarə Heyətinin sədri
Enver Özeren və “Qafqaz” Universitetinin rektoru Ahmet Saniç də iştirak
edib.
Qonaq əvvəlcə liseyin tədris şəraiti ilə tanış olub. Sinif
otaqlarını, kitabxanasını, laboratoriyalarını gəzib. tətbiq olunmuş yeni
tədris texnologiyaları ilə tanış olub. Görüş zamanı E. Özeren “Çağ”
Öyrətim İşlətmələri tədris müəssisələrinin təhsildə əldə etdikləri
nailiyyətləri, uğurları barədə məlumat verib. Məzunlarının TQDK-nın ali
məktəblərə qəbulla bağlı keçirdiyi imtahanlarda ən yüksək bal
toplamalarından, şagirdlərinin respublika və Beynəlxalq Fənn
Olimpiadalarında qızıl, gümüş və bürünc medallar qazanmalarından
danışıb. Təhsildə bu uğurların daha da yüksəldilməsi üçün lazımi
şəraitin hazırlandığını bildirib.
Qonaq liseylə tanışlıqdan sonra burada
şagirdlər üçün hazırlanmış şəraitdən və “Çağ” Öyrətim İşlətmələri
tədris müəssisələrinin təhsildə əldə etdiyi uğurlarından məmnun olduğunu
bildirərək və onlara təhsildə uğurlar arzulayıb.
