Hamımız bir olaq, Dilimizi qoruyaq!
31 March, 2012
“Dilimizi
qorumaq, inkişaf etdirmək hər birimizin borcudur!”. Bu fikir Azərbaycan
dili və ədəbiyyatı bölümü və ədəbiyyat klubunun təşkilatçılığı ilə
təqdim olunan “Hamımız bir olaq, Dilimizi qoruyaq!” tədbirinin
leytmotivinə çevrildi. Universitetin Azərbaycan dili və ədəbiyyatı
bölümünün müdiri, filologiya elmləri doktoru, professor Akif Hüseynli
tədbirdə çıxış edərək, dildə gedən proseslərə nəzər saldı: “Dil-düşüncə
tərzidir. Dil- sərvətimizdir. Dil -Sizlərə verilən əmanətdir. Dildə arzu
olunan və olunmayan proseslər gedir. Yaxşı olardı ki, bu prosesləri
müəyyən sağlam məcraya yönəltmək mümkün olsun. Daha çox da radiolarda
DJ-lərin dililə bağlı biabırçı vəziyyət var. Dildə gedən proseslərə,
xüsusən də mənfi meyllərə kimsə biganə qala bilməz. Başa düşmək lazımdır
ki, bu proseslərin dərinləşməsi dili həqiqətən uçuruma apara
bilir”. Akif müəllim Azərbaycan dilinin yüksək keyfiyyətlərindən
danışaraq dünya dilləri içərisində yalnız ana dilimizin ahəng qanunu
olduğunu vurğuladı. Ayrı-ayrı dövrlərdə yaşayıb-yaratmış görkəmli
şəxsiyyətlərin ana dilimizə xüsusi qayğısından söhbət açaraq “Anamın
kitabı” pyesinin müəllifi Cəlil Məmmədquluzadənin bu zərurəti vaxtında
və tam mə’nası ilə başa düşən, onu həyata keçirmək uğrunda var qüvvəsi
ilə çalışan ən görkəmli sənətkarlarımızdan biri olduğunu diqqətə
çatdırdı: “Əgər biz də böyük ədibimiz C. Məmmədquluzadə kimi, canlı
tələffüzü, ümumxalq ifadə tərzini əsas götürsək böyük ədibin həqiqəti
müşahidə qabiliyyətinin son dərəcə güclü olduğunun şahidi olarıq”.
Universitetin
prorektoru, professor Niftalı Qocayev dilimizin lüğət tərkibinin
müəyyən yollarla zənginləşməsində televiziya, radio və mətbuatın
funksiyasını önə çəkdi.
Tədbirdə
ədəbiyyat klubunun fəaliyyətindən bəhs edən video görüntülər maraqla
izləndi. Əyləncəli, intellektual söz yarışmaları ilə davam edən tədbir
Sevinc İmanovanın ifasında Bəxtiyar Vahabzadənin “Ana dili” şeirinin
qurur duyduğumuz bu misralarıyla bitdi:
Ən qiymətli mirasdır, onu gözlərimiz tək
Qoruyub, nəsillərə biz də hədiyyə verək.
