Qafqaz Universitetinə daxil olmuş tələbələrin 50 nəfəri 650-dən yüksək bal toplayıb

Bu fakt sentyabrın 15-də Qafqaz Universitetində keçirilən 2012-2013-cü dərs ilinin açılışı mərasimində açıqlandı. Tədbirdə universitetin professor-müəllim heyəti, tələbələr, valideynlər,  iş dünyasının təmsilçiləri, mətbuat  nümayəndələri iştirak edirdilər.
Azərbaycan xalqının ümummilli lideri Heydər Əliyevin və Türkiyə Cümhuriyyətinin qurucusu Mustafa Kamal Atatürkün, hər iki ölkənin müstəqilliyi uğrunda mübarizədə şəhidlik zirvəsinə ucalan vətən övladlarının xatirəsinin bir dəqiqəlik sükutla yad edilməsi, Azərbaycan və Türkiyə respublikalarının dövlət himnlərinin oxunması ilə başlayan mərasimdə Qafqaz Universitetinin rektoru, professor Ahmet Saniç açılış nitqi söylədi.
Tələbə və müəllimləri, mərasimin digər iştirakçılarını yeni dərs ilinin başlanması və "Bilik günü" münasibəti ilə təbrik edən rektor bir dünya universiteti, bilik və elm mərkəzi olmaq yolunda uğurla irəliləyən universitetlərinin son illər verdiyi təhsilin yüksək səviyyəsinə görə həm Azərbaycan dövləti və xalqının, həm də Türkiyə və bölgə ölkələrinin etibarını qazandığını bildirdi.
Qeyd etdi ki, universitetin 3000-dən çox məzunu hazırda dünyanın 54 ölkəsində çalışır. Azərbaycan xaricində 70, ölkə daxilində 9 universitetlə əməkdaşlıq əlaqələri quran universitet son 2 ildə Avropa İttifaqının 6 "TEMPUS" və 3 "Erasmus Mundus" tələbə mübadiləsi proqramı qazanmışdır. Bir sıra iri beynəlxalq və Azərbaycan şirkətləri ilə sıx əməkdaşlıq edən universitetdə BP şirkətinin sponsorluğu ilə müasir kimya mühəndisliyi laboratoriyaları yaradılmış, gələn ildə isə inşaat mühəndisliyi laboratoriyasının açılması nəzərdə tutulmuşdur.
Rektor, eləcə də universitetlərində "Azercell-Telekom" şirkətinin sponsorluğu ilə yaradılmış 2, 3 və 4G laboratoriyalarını, "Aksesuar-İnşaat" şirkətinin sponsorluğu ilə açılmış elektronika laboratoriyasını iş dünyası ilə əlaqələrə misal kimi göstərdi.
Professor A.Saniç çıxışında universitetlərinin bir sıra beynəlxalq reytinq təşkilatlarının apardığı sorğuya görə dünyanın 700 ən yüksək reytinqli universiteti siyahısına düşdüyünü, Azərbaycanın ali məktəbləri arasında da bu baxımdan öncüllərdən olduğunu vurğuladı. Qeyd olundu ki, bu il ali məktəblərə qəbul imtahanlarında 650-dən çox bal toplayan 50 abituriyent Qafqaz Universitetini seçmişdir ki, bu da həmin ali məktəbin getdikcə artan nüfuzundan xəbər verir. Rektor tələbələrə, xüsusən də bu il Qafqaz Universitetini seçən gənclərə gələcək təhsillərində uğurlar arzuladı.
Sonra mərasimdə "Çağ" Öyrətim İşlətmələri şirkətinin prezidenti Ənvər Özərən, Abşeron Rayon İcra Hakimiyyəti başçısının müavini Sərviz Süleymanov, Milli Məclisin deputatı Kamilə Əliyeva və başqaları çıxış edərək tələbələrə və müəllimlərə təbriklərini çatdırdılar.
Açılış mərasimində qəbul imtahanlarında ən yüksək - 700 bal toplayaraq Qafqaz Universitetinin Dünya iqtisadiyyatı fakültəsinə qəbul olunmuş Nərgiz Məzahirqızına, sənayenin təşkili və idarəetmə fakültəsinə qəbul olunmuş Orxan Səfərova, 650-dən yüksək bal toplamış tələbələrə mükafatlar təqdim edildi, təbrik çıxışları oldu.
Tədbirdə habelə 2011-2012-ci dərs ilində universitetin ən fəal klubu adını qazanmış "Oğuz klubu"nun rəhbəri Kənan Şıxəliyevə, "İlin klub məsləhətçisi" nominasiyasının qalibi, biznesin idarə edilməsi fakültəsinin baş müəllimi Rasim Abutalıbova mükafatlar təqdim olundu.
Mərasim "Tələbə baharı" IV ümumrespublika tələbə yaradıcılığı festivalında müxtəlif nominasiyalar üzrə qalib adını qazanmış universitetin musiqi kollektivləri və tələbələrinin ifasında konsert proqramı ilə davam etdi. 
Yusif ƏLİYEV

Bu blogdaki popüler yayınlar

Azerbaijan - GOV - Azerbaijan to Host an International ICT Conference

Özəl və dövlət ali təhsil məktəbləri arasındakı fərq

VİCDAN SUSTUĞUNDA : Download PDF