TİKA gələn il Azərbaycanda 100-dək layihə həyata keçirəcək

Türkiyə Nazirlər Kabineti yanında Əməkdaşlıq və Koordinasiya Agentliyinin (TİKA) Azərbaycan üzrə proqram əlaqələndiricisi Salih Polat bu gün Qafqaz Universitetində seminar verib. Seminar TİKA-nın son bir ildə Azərbaycandakı fəaliyyətlərinə və gələcək planlarına həsr olunub.

S. Polat TİKA-nın hazırda türk cümhuriyyətləri başda olmaqla, dünyanın 26 ölkəsində ofis açdığını söyləyib: “Bundan əlavə, TİKA dünyanın 100-ə yaxın ölkəsi ilə əməkdaşlıq etməkdədir. Qurum Azərbaycanda 1994-cü ildə fəaliyyət göstərməyə başlayıb”.  TİKA rəsmisi indiyə qədər Azərbaycanda həyata keçirilmiş layihələrin bütün sahələri əhatə etdiyini söyləyib: “2011-ci il üçün 65 layihə nəzərdə tutulub. Artıq bu layihələrdən 40-dan çoxu həyata keçirilib. Gələn ilin əvvəllərinə kimi qarşımıza qoyduğumuz 65 layihənin hamısını həyata keçirməyə çalışacağıq. Gələn il üçün bu layihələrin sayı 100-ə  çatdırılacaq”. S. Polat deyib ki, bu layihələrdən ən başlıcası “Gənclərin Elmi Araşdırmalarına Dəstək” layihəsidir. Qonaq həmçinin bu il TİKA-nın arıçılıq sahəsinə xüsusi diqqət ayırdığını və Azərbaycanda toxumluq buğdanın inkişafına güclü dəstək verdiyini bildirib: “Bunun üçün Türkiyədən ekspertlər dəvət olunub, xüsusi dərman preparatları gətirilib”.  Universitetin rektoru, professor Əhmet Saniç isə TİKA-“Qafqaz” əməkdaşlığından danışıb: “Son 4 il ərzində TİKA-nın dəstəyi ilə universitetimizin İqtisadiyyat fakültəsinin tələbələri praktika üçün Türkiyədə fəaliyyət göstərən banklara və bələdiyyələrə göndərilib”. http://www.zaman.az/az/newsDetail_getNewsById.action?newsId=41411