Kimyaçıların plenar iclasında nələr baş verdi? -FOTOLAR
Aprelin
18-də Azərbaycan Dövlət Neft Şirkətinin və Qafqaz Universitetinin
təşkilatçılığı və dəstəyi ilə təşkil olunan, Ulu öndər Heydər Əliyevin
90 illiyinə həsr edilmiş 1-ci Beynəlxalq Kimya və kimya mühəndisliyi
konfransının proqramı çərçivəsində ARDNŞ-in «Azərikimya» İstehsalat
Birliyində tədbir iştirakçılarının plenar yığıncağı keçirilib.
Dünyanın bir çox ölkələrinin neft-kimya sahəsində
çalışan nüfuzlu elm xadimlərinın, gənc alimlərin, kimya istehsalatı
rəhbərlərinin, həmçinin «Azərikimya» İB-nin aparıcı mütəxəssislərinin
iştirak etdiyi tədbirdə Azərbaycanın və xarici ölkələrin kimya və
neft-kimyası sahəsində nüfuz sahibi olan kimyaçıların, o cümlədən Qafqaz
Universitetinin, «Azərikimya» İstehsalat Birliyinin, Azərbaycan Dövlət
Neft Akademiyasının, Neft-Kimya Prosesləri İnstitutunun, Bakı Ali Neft
Məktəbinin, «Petkim Petrokimya Holding» A.Ş.-nin, Bakı Dövlət
Universitetinin, Türkiyənin Atatürk və Yıldız Texniki
Universitetlərinin əməkdaşlarının məruzələri dinlənilib.
İstehsalat-texnologiya, katalizatorlar və ekologiya, tullantıların
utilizasiyası bölmələri üzrə «İlkin emal benzini fraksiyasının bitgi
yağı ilə birgə termiki çevrilməsi sayəsində olefinlərin alınması»,
«Kimya sənayesinin inkişafı və yeni texnologiyaların tətbiqi», «Bərk
neft tullantıları əsasında polimer-bitum kompozisiyasının alınması»,
«Sənayedə avadanlıqları ərpdən təmizləmək üçün tərkibin yaradılması»,
«Polimer tullantılarının ekoloji zərərsizləşdirilməsi» və s. məruzələr
konfrans iştirakçıları tərəfindən maraqla qarşılanıb.
Məruzələr başa çatdıqdan sonra kimya və neft
kimyasının nəzəri və praktik məsələləri, fiziki və analitik kimyanın
aktual problemləri, kimya sahəsində müasir elmi-tədqiqatlar, ekoloji
təmiz, zərərsiz kimyəvi-innovativ texnologiyalar və s.-lə bağlı dialoq
və müzakirələr aparılıb.
Konfransın plenar yığıncağında “Azərikimya” İB-nin
Müşahidə Şurasının sədri, Milli Məclisin deputatı Muxtar Babayev,
Neft-kimya Prosesləri İnstitutunun direktoru, AMEA-nın müxbir üzvü,
kimya elmləri doktoru, professor Vaqif Abbasov, Qafqaz Universitetinin
rektoru professor Ahmet Sanıç, Azərbaycanda yüksək elmi təhsil şəbəkəsi
yaratmağa nail olmuş “Çağ öyrətim işlətmələri”nin rəhbərliyi və digər
rəsmi qonaqlar, həmçinin respublika qəzet və informasiya agentliklərinin
nümayəndələri iştirak ediblər.
