24 Nisan 2013 Çarşamba

I Beynəlxalq Kimya və kimya mühəndisliyi konfransı işini başa çatdırmışdır

 
Azərbaycan xalqının Ümummilli lideri Heydər Əliyevin 90 illik yubileyinə həsr olunmuş “Kimya və Kimya texnologiyalarının aktual problemləri” mövzusunda 1-ci Beynəlxalq Konfrans öz işini uğurla başa çatdırmışdır. ARDNŞ və Qafqaz Universitetinin təşkilatçılığı və dəstəyi ilə baş tutmuş konfransda dünyanın kimya və kimya texnologiyaları sahəsində aparıcı mövqe tutan 13 ölkədən, o cümlədən ABŞ, Kanada, Rusiya, İngiltərə, Almaniya, Türkiyə, İran, Gürcüstan və digər xarici ölkələrdən 80-dən artıq görkəmli elm adamları, şirkət və firmaların nümayəndələri iştirak etmişlər. 
Konfransın keçirilməsində əsas məqsəd dünyanın bir çox ölkələrinin neft-kimya sahəsində çalışan nüfuzlu elm xadimlərinın və istehsalat rəhbərlərinin daha sıx və səmərəli elmi əməkdaşlığının təmin edilməsi, neft-kimya sənayesinin perspektivləri, yeni layihələrin reallaşdırılması kimi aktual məsələlər ətrafında müzakirələrin aparılması olmuşdur. 
Dörd gün davam edən konfransın plenar iclaslarında elmi və praktik kimyanın ak-tual sahələri üzrə Azərbaycan və xarici ölkələrin kimya və neft-kimyası sahəsində nüfuz sahibi olan alimlərin, o cümlədən Qafqaz Universitetinin, «Azərikimya» İstehsalat Birliyinin, Azərbaycan Dövlət Neft Akademiyasının, Neft-Kimya Prosesləri İnstitutunun, Bakı Ali Neft Məktəbinin, «Petkim Petrokimya Holding» A.Ş.-nin, Bakı Dövlət Universitetinin, Türkiyənin Atatürk və Yıldız Texniki Universitetlərinin əməkdaşlarının 70-ə qədər məruzəsi maraqla dinlənilmiş, fiziki və analitik kimyanın mühüm problemləri, müasir elmi-tədqiqatlar, ekoloji təmiz, zərərsiz kimyəvi-innovativ texnologiyalar və s. məsələlərlə bağlı geniş fikir mübadiləsi aparılmışdır.

Konfransın plenar yığıncaqlarında Neft-kimya Prosesləri İnstitutunun direktoru, AMEA-nın müxbir üzvü, professor Vaqif Abbasov, Qafqaz Universitetinin rektoru professor Ahmet Sanıç, “Azərikimya” İB-nin Müşahidə Şurasının sədri, Milli Məclisin deputatı Muxtar Babayev və başqaları çıxış etmiş, müasir kimya qarşısında duran mühüm məsələlərlə bağlı fikir və mülahizələrini bildirmişlər.