Türkiyə Ali Təhsil Şurasının sədri: “Qafqaz” beynəlxalq universitetə çevrilib
Bu barədə Bakıda səfərdə olan Türkiyə Ali Təhsil
Şurasının (Yükseköğretim Kurulu) sədri Gökhan Çetinsaya bildirib. Onun
sözlərinə görə, hazırda Türkiyə universitetlərində 5 minə yaxın
azərbaycanlı tələbə təhsil alır: “Hazırda Türkiyə universitetlərinin
birinə azərbaycanlı rektor rəhbərlik edir. İki ölkə arasında əlaqələr
genişləndikcə Türkiyədə çalışan azərbaycanlı rektorların sayının
artmasını arzu edirik”. Azərbaycanın təhsil nazirinin dəvəti ilə Bakıya
səfər edən Çetinsayanın başçılıq etdiyi nümayəndə heyəti bu gün Fəxri
xiyabanda ümummilli lider Heydər Əliyevin məzarını ziyarət edib, daha
sonra Şəhidlər xiyabanında şəhidlərin xatirəsini yad edib, Türk
şəhidliyini də ziyarət edib. Gökhan Çetinsayanın rəhbərlik etdiyi
nümayəndə heyəti Bakı Dövlət Universitetində (BDU) də olub.
Gökhan
Çetinsaya dünən Qafqaz Universitetində də olub. Universitetin 20 illiyi
münasibəti ilə keçirilən tədbirdə Ərzurum Atatürk Universitetinin
rektoru Hikmət Koçak, Girəsun Universitetinin rektoru Aygün Attar, Rizə
Tayip Ərdoğan Universitetinin rektoru Arif Yılmaz, Ardahan
Universitetinin rektoru Ramazan Korkmaz, Anadolu Universitetinin rektoru
Davut Aydın, Şimali İraq İşıq Universitetinin rektoru Ahmet Özbay,
həmçinin Türkiyə səfirliyinin, Təhsil Nazirliyi nümayəndələri də iştirak
edirdilər. Qafqaz Universitetlər Birliyinin rəhbəri Gökhan Çetinsaya
görülməsi planlaşdırılan işlərdən danışdı. G. Çetinsaya Qafqaz
Universitetlər Birliyinin inkişafının vacibliyini, dünyada nümunəvi
səviyyəyə çatdırılmasının əhəmiyyətini qeyd etdi, bu işdə Azərbaycanın
və Türkiyənin üzərinə çox böyük iş düşdüyünü vurğuladı.
Türkiyə Ali
Təhsil Şurasının (Yükseköğretim Kurulu) sədri “Qafqaz”ın beynəlxalq
unversitetə çevrildiyini qeyd etdi. G. Çetinsaya Qafqaz Universitetlər
Birliyinin illik toplantısının Azərbaycanda keçiriləcəyini də sözlərinə
əlavə etdi.
Əslən azərbaycanlı olan Girəsun Universitetinin rektoru
Aygün Attar Çağ Öyrətim Şirkətinin və Qafqaz Universitetinin
Azərbaycanda təhsilin inkişafındakı rolundan bəhs etdi. Sonda Qafqaz
Universiteti ilə Girəsun Universiteti arasında memarandum imzalandı.
Fədail Fətullayev
http://www.zaman.az/az/newsDetail_getNewsById.action?newsId=46766
