Sumqayıtda X “Ana dilimizi sevək, sevdirək” müsabiqəsinin finalı keçirilib
Dekabrın 26-da Sumqayıt Dövlət Universitetində X “Ana dilimizi sevək,
sevdirək” müsabiqəsinin inşa, qrammatika, internet səhifəsinin
hazırlanması, şeir və mahnı kateqoriyaları üzrə Sumqayıt şəhər final
mərhələsi keçirilib. Müsabiqə Azərbaycan Respublikasının Dövlət Himninin
oxunması ilə başlayıb. Tədbirdə Sumqayıt Özəl Türk Liseyinin müdiri
Ahmet Çamalan çıxış edərək ümummilli lider Heydər Əliyevin Azərbaycan
dilinin qorunmasında və inkişafındakı tarixi xidmətlərindən geniş söhbət
açıb. Bu tədbirin keçirilməsinin əhəmiyyətindən danışan Ahmet Çamalan
bildirib ki, əsas məqsəd gənc nəslin vətənpərvərlik ruhunda tərbiyə
olunmasına, ana dilimizin müqəddəsliyinin qorunub saxlanmasına, inkişaf
etdirilməsinə və gələcək nəslə bu dilə xələl gətirilmədən çatdırılmasına
xidmət etməkdir. Liseyin müdiri çıxışında onuda qeyd edib ki, müsabiqə
qalibləri gələn ilin yayında Türkiyədə keçiriləcək Türk Dili
olimpiadasında Azərbaycanı təmsil edəcəklər. Orada ölkəmizin
maddi-mədəni dəyərlərini olimpiadada iştirak edən dünyanın bir çox
nümayəndələrinə Azərbaycan dilində çatdıracaqlar. A. Çamalan çıxışının
sonunda müsabiqə iştirakçılarına uğurlar diləyib.
Sonra Sumqayıt Dövlət Universitetinin rektoru Nadir Qəhrəmanov və
prorektoru Yadigar Hüseynov, Sumqayıt Şəhər təhsil şöbəsinin müdiri
Mahal Əliyev və başqaları çıxış edərək bu müsabiqənin gənclərin
həyatında əxlaqi-tərbiyəvi əhəmiyyətindən, dilimizin saflığının
qorunmasında təbliğ olunmasında mühüm əhəmiyyət kəsb etməsindən
danışıblar və müsabiqədə Sumqayıt şəhərində yerləşən məktəblərin
əksəriyyətinin iştirak etdiyini bildiriblər. Müsabiqə iştirakçılarına
uğurlar diləyiblər.
Müsabiqənin münsiflər heyətində Azərbaycanın tanınmış mədəniyyət
nümayəndələri muğənnilərdən Nadir Qafarzadə, Elariz Məmmədoğlu, aktyor
Tərlan Nuryaşar iştirak ediblər.
Tədbirin sonunda qalib şagirdlər müəyyənləşdirilib və mükafatlandırılıblar.
Müsabiqədə Azərbaycan – Türkiyə Özəl Liseyləri Baş İdarə rəisi Mesut
Kurnaz və “Qafqaz “Universitetinin rektoru, professor Ahmet Saniç
iştirak ediblər.
