Tələbə gəncin sənət dünyası
26 January, 2013, Qafqaz
Universiteti gənc nəslin təlim-tərbiyəsində, elm və təhsilində, yüksək
ixtisaslı gənc mütəxəssislərin hazırlanmasında bütün təhsil ocaqlarına
örnək olaraq qalmaqdadır. Bu öncüllük universitet tələbələrinin
ayrılıqda hər birinin əldə etdiyi bilik, savad və tərbiyə, yaradıcılıq
və mənəvi-əxlaqi fəallığı nəticəsində qazanılmışdır.
Universitetin
Mədəniyyət şöbəsinin nəzdində fəaliyyət göstərən Rəsm kursunun fəal
üzvlərindən olan Eşqin Şükürov İqtisadiyyatın Hüquqi tənzimləməsi
bölümünün son kurs tələbəsidir. Dərsdən sonra asudə vaxtlarında rəsm
sənətinin sirlərini öyrənir. Eşqinin mənzərə janrnda böyük həvəs və
məhəbbətlə çəkdiyi rəngarəng rəsmlər universitetdə sərgilənir. Onun
“Ümid”, “Sezgi”, Xocalı faciəsini əks etdirən “Ata və oğul”, həmrəylik
mövzusunda “Gövdənin budaqları” əsərləri həm yaşıdlarını, həm də
universiteti ziyarət edən qonaqların diqqətini çəkir.
Rəsm dili
təbiətdəki rənglərin homoniyasını özünəməxsus ifadə tərzi ilə
birləşdirən gənc rəssam sənəti həyat tərzi adlandırır. Onun fərdi
dəst-xətti, yaradıcılıq üslubu, orijinal yaradıcılıq axtarışları,
təbiətdə gördüyümüz əlvan və parlaq rənglərin zəngin koloriti ilə
seçilir.
“Onun əsərləri təkcə sənətsevərlər üçün deyil, rəssamlar üçün
də maraqlıdır” söyləyən kurs rəhbəri dr. Arzu Məmmədovanın tövsiyyələri
ilə çoxsaylı uğurlara imza atan Eşqin Şükürovun yaradıcılıq qabiliyyəti
universitet rəhbərliyi tərəfindən yüksək qiymətləndirilərək, ona
noutbook hədiyyə edilmişdir.
Semestr sonu imtahanlarda müvəffəqiyyət
qazanan Eşqin üçün bu hədiyyə ikiqat sevincə səbəb oldu. Bu diqqət və
qayğıdan böyük qürur duyaraq yeni əsərlər yaratmağa ruhlandığını
vurğuladı.
Eşqin Şükürova yeni yaradıcılıq uğurları və əsərlərini dünya miqyasında nümayiş etdirməyi arzulayırıq.
