QAFQAZ ARAŞDIRMALARI İNSTITUTUNUN AZƏRBAYCAN-TÜRKIYƏ MƏDƏNI ƏLAQƏLƏRINƏ NÖVBƏTI TÖHFƏSI
Yanvar ayının 11-də Qafqaz Araşdırmaları
İnstitutunun müdiri dos.Mehmet Rıhtım Türkiyə Cümhuriyyəti, İstanbul
Pendik Bələdiyyəsinin dəvətilə İstanbulda rəssam Viktor Vasyakinin
rəsmlərindən mütəşəkkil sərgi açmışdır. ‘Bakü’de İstanbul Düşleri’ adlı
sərgi Azərbaycan əsilli rus rəssam Viktor Vasyakinin İstanbulu təsvir
etdiyi tablolardan ibarətdir. Rəsmlərin kolleksioneri olan Mehmet Rıhtım
sərginin təşkilatçılığını həyata keçirməkdədir. Mehmet Akif Ersoy sənət
mərkəzində yanvarın 21-ə qədər davam edəcək sərgidə rəssamın 14 yağlı
və 29 sulu boya rəsmləri yer alır. Sərginin açılışını Ak Parti İstanbul
millətvəkili Erol Kaya, Pendik Bələdiyyə Başkanı Dr. Kenan Şahin,
Kaymakam Cafer Odabaş və İstanbul İl Genel Meclis Başkanı Hüsamettin
Koçak etdi.
Rəssam Viktor Vasyakinin müəyyən səbəblərdən sərgiyə qatılmadığını
söyləyən kolleksioner Mehmet Rıhtım “O bu rəsimləri çəkərkən arada bir
soruşurdu, “İstanbul hələ də belədirmi?” Bu əsərlər təxminən 15 illik
bir əməyin məhsuludur. Əsərlər çox incə və həssasdır. Sanki incə
işlənmiş bir miniatür kimidir.” dedi.
Rəssam əsərlərində xüsusilə İstanbulun tarixi abidələri, məbədləri,
şəhərin siluetini təsvir edib. Yaradıcılığının orijinallığı isə ondadır
ki, yağlı və sulu boya çalışmaları sanki miniatür sənətini əks etdirir.
