"Avro Med" şirkəti Qafqaz Universitetində biologiya laboratoriyası yaradacaq
08 Mart - № 10; İş
dünyası ilə sıx əlaqələr qurmağı fəaliyyətinin əsas
istiqamət və hədəflərindən sayan Qafqaz Universiteti bu
günlərdə həmin yöndə daha bir uğurlu addım atıb.
Universitetlə "Avro Med" şirkəti arasında əməkdaşlığa
dair memorandum imzalanıb. Memoranduma əsasən "Avro Med"
şirkəti Qafqaz Universitetində biologiya laboratoriyası
quracaq. Bu münasibətlə martın 2-də Qafqaz
Universitetində imzalama mərasimi keçirilib.
Mərasimi universitetin rektoru, professor Əhməd Saniç
açaraq bildirdi ki, artıq bir neçə ildir rəhbərlik
etdiyi ali məktəbdə bir çox digər ixtisaslarla yanaşı,
kimya-biologiya müəllimliyi ixtisası üzrə kadr hazırlığı
da həyata keçirilir. Həmin ixtisas üzrə yüksək
keyfiyyətli mütəxəssislərin hazırlanması üçün zəruri
olan kimya laboratoriyası ötən il BP-Azərbaycan
şirkətinin maliyyə və texniki dəstəyi ilə yaradılaraq
tələbələrin istifadəsinə verilib. Biologiya
laboratoriyası yaratmağı isə universitetin yenicə
işgüzar əlaqələr qurduğu "Avro Med" şirkəti öhdəsinə
götürüb. "Avro Med" şirkətinin təşəbbüsünü xeyirxahlığın,
xeyriyyəçiliyin nümunəsi kimi dəyərləndirən Ə.Saniç bu
niyyətlərinə görə şirkətin baş direktoru, Milli Məclisin
deputatı Cavanşir Feyziyevə minnətdarlığını bildirdi və
təşəbbüsün bir neçə aya reallaşacağını diqqətə çatdırdı.
Mərasimdə çıxış edən "Avro Med" şirkətinin baş direktoru,
Milli Məclisin deputatı C.Feyziyev bu yaxınlarda
Azərbaycanın müstəqilliyinin və "Çağ" Öyrətim şirkətinin
ölkəmizdə fəaliyyətə başlamasının 20 illiyi ilə bağlı
universitetdə keçirilən tədbirdə iştirakını məmnunluqla
xatırladaraq 20 il ərzində "Çağ" Öyrətim şirkətinin,
onun təhsil müəssisələrinin Azərbaycan təhsilinin
inkişafına böyük töhfələr verdiyini bildirdi və
ölkəmizdə ali təhsilin keyfiyyətinin yüksəldilməsində,
yeni təhsil texnologiyalarının Azərbaycana
gətirilməsində Qafqaz Universitetinin rolunu yüksək
qiymətləndirdi. C.Feyziyev ümummilli lider Heydər
Əliyevin "Təhsil millətin gələcəyidir" sözlərini misal
gətirərək bildirdi ki, hamı, xüsusən də imkanlı adamlar,
şirkətlər təhsilin inkişafına kömək etməlidir. Biz
Qafqaz Universitetini yaxşı tanıyırıq. Bilirik ki, bura
xərclənən vəsait hədər getməz, o üzdən burada
laboratoriya yaratmaq təşəbbüsündə bulunmuşuq.
Sonra Qafqaz Universiteti ilə "Avro Med" şirkəti
arasında əməkdaşlığa dair memorandum imzalandı. Sənədi
professor Əhməd Saniç və "Avro Med" şirkətinin baş
direktoru C.Feyziyev imzaladılar.
Yusif ƏLİYEV
