Evliya Çələbinin Azərbaycana beşinci gəlişi
Dünən
Türkiyənin ölkəmizdəki səfirliyində “Evliya Çələbi səyahətnaməsində
Azərbaycan” kitabının təqdimatı və tanınmış səyyaha həsr olunmuş
sərginin açılışı olub.
Tədbirdə
çıxış edən Türkiyənin ölkəmizdəki səfiri Alper Çoşkun əsərin işıq üzü
görməsində əməyi olan hər kəsə təşəkkürünü bildirib və oxşar layihələrin
davamlı olacağını əminliklə vurğulayıb.
Filologiya elmləri üzrə fəlsəfə doktoru, dosent Mehmet Rıhtım deyib
ki, “Evliya Çələbi səyahətnaməsində Azərbaycan” kitabında türkiyəli
səyyahın Azərbaycana 1646-1666-cı illər ərzində etdiyi 4 səyahət zamanı
müşahidə etdiyi sosial, mədəni, dini, siyasi və digər mövzular öz əksini
tapıb: “Onun səyahət yolu qədim Azərbaycan torpaqlarından - Urmiyədən
başlamış Naxçıvan, İrəvanı keçməklə Təbrizə, Bakıya uzanır. Azərbaycanın
bağ-bağçalarında yetişən meyvələrdən, xalqın milli adət-ənənəsinin ən
incə detallarından tutmuş kəndlərin, şəhərlərin təsvirinədək hər şey bu
günümüz üçün xüsusi maraq oyadır”. Kitab Evliya Çələbinin “Səyahətnamə”
əsərinin müəyyən hissələrinin tərcüməsidir. O, həmçinin vurğulayıb ki,
Qafqaz Universitetinin Elmi Şurasının və Türkiyə Cümhuriyyəti
Başbakanlık Tanıtma Fonu dəstəyi ilə “Nurlar” nəşriyyatında işıq üzü
görmüş kitab üzərində onunla yanaşı, filologiya elmləri doktoru
Minəxanım Təkləli, AMEA-nın müxbir üzvləri - tarix elmləri doktoru,
millət vəkili Yaqub Mahmudov və memarlıq elmləri doktoru Cəfər Qiyasi də
işləyiblər.
“Evliya Çələbi səyahətnaməsində Azərbaycan” kitabını böyük hadisə
kimi dəyərləndirən Yaqub Mahmudov bildirib ki, biz Azərbaycan tarixini
yenidən yazırıq. Məhz belə əsərlər tariximizin düzgün yazılmasında
qiymətli məxəz rolunu oynayır”. Onun sözlərinə görə, belə əsərlər bəşər
tarixini də öyrənmək baxımından olduqca qiymətlidir. Onun möhtəşəm
əsəri keçmişin etibarlı aynasıdır, həm də yeni çağdaş ruhlu abidədir
ki, yaşadığımız yeni dövrün çətin məqamlarında mübarizələrimizdə
dayağımıza çevrilir.
Filologiya elmləri doktoru Minəxanım Təkləli isə “Evliya Çələbi
səyahətnaməsində Azərbaycan” kitabını onun ölkəmizə beşinci gəlişi kimi
dəyərləndirib. Cəfər Qyasi isə təqdimatı keçirilən nəfis kitabın elmi və
tarixi əhəmiyyətindən söz açıblar. Onun sözlərinə görə Evliya Çələbi
yalnız bir səyyah deyil, həm də ensiklopedik biliyə malik bir şəxs olub.
Təqdimat mərasimində foto, qrafika, rəsmlərdən ibarət slaydların nümayişi də maraqla qarşılanıb.
Qvami Məhəbbətoğluhttp://www.zaman.az/az/newsDetail_getNewsById.action?newsId=47533
