Xalq Yazıçısı Anarla“Qafqaz” Universitetində görüş
Oktyabrın 21-də “Qafqaz” Universitetində Xalq Yazıçısı Anarla universitetinin professor- müəllim heyəti və tələbələrlə görüşü keçirilib. Görüşdə “Çağ” Öyrətim İşlətmələrinin İdarə Heyəti sədri Enver Özeren iştirak edib. Görüşü açıq elan edən “Qafqaz” Universitetinin prof. Akif Hüseynov bildirib ki, Anar bütün dövrlər üçün sevilən və mütaliə edilən yazıçı, peşəkar ədəbiyyatşünas, yetkin kino xadimidir. Anar milli-mənəvi dəyərlərə sıx bağlı olan bir şəxsiyyətdir. Onun çoxşaxəli yaradıcılığı müasir Azərbaycan oxucusunun bədii-estetik zövqünün formalaşmasında əhəmiyyətli rol oynayıb. Anarın “Sizsiz”, “Mübarizə bu gün də var”, və s. əsərləri həm tədqiqat üsulu cəhətcə, həm də janrca yenidir. Bu əsərlərdə ustad şairimiz Rəsul Rza poeziyasının yeri, mövqeyi yüksək peşəkarlıqla ortaya qoyulub.
A. Hüseynov çıxışında onu da bildirib ki, Anar haqqında çox danışmaq olar ona görə ki, müasir Azərbaycan ədəbiyyatını onsuz təsəvvür etmək mümkün deyil. O, zamanı özünə, özünü zamana hopduran, ciddi, səmimi yazıçıdır. Buna görə də onun əsərləri həmişə maraqla qarşılanır. Onun bu gün də, sabah da, gələcəkdə də oxunası əsərləri var. Olduqca maraqlı keçən görüşdə A. Rzayev universitetin professor- müəllim heyətini və tələbələri maraqlandıran sualları cavablandırıb.Tədbirin sonunda xalq yazıçısı Anar maraqlı görüş üçün “Qafqaz” Universitetinin rəhbərliyinə və İçtimai Televiziyanin rəhbərliyinə bütün iştirakçılara öz dərin təşəkkürünü bildirib. Görüşdə respublikamızın Xalq artisti Flora Kərimova, Əməkdar artist Aygün Bəylər və bir çox tanınmış müğənnilər ifa etdikləri mahnılarla gecəyə başqa bir rəng qatıblar.Sonda, “Çağ” Öyrətim İşlətmələri İdarə Heyətinin sədri Enver Özeren Xalq yazıçısına xatirə hədiyyəsi təqdim edib.
