AMEA-nın Şərqşünaslıq İnstitutu və Qafqaz Universiteti birgə elmi konfranslar keçirəcək
Bakı – APA. Bu gün Qafqaz Universitetinin
rektoru, prof. dr. Ahmet Sanıç və həmin universitetin Pedaqogika
fakültəsinin dekanı, dosent Erdal Karaman AMEA akademik Ziya Bünyadov
adına Şərqşünaslıq İnstitutunda olublar. APA-nın xəbərinə görə, onlar
Şərqşünaslıq İnstitutunun direktoru, millət vəkili, professor Gövhər
Baxşəliyeva ilə görüşüblər. Görüşdə bu iki elm və təhsil müəssisəsi
arasında əlaqələrin genişlənməsi perspektivləri müzakirə olunub və birgə
elmi tədbirlərin keçirilməsi ilə bağlı konkret ilk addımlar atılıb.
Əldə olunan razılığa əsasən, Şərqşünaslıq İnstitutu və Qafqaz
Universiteti noyabrın 21-də «Nizami Gəncəvi və Şərq ədəbiyyatları» adlı
beynəlxalq konfrans keçirəcək. Bundan əlavə, tərəflər arasında gələn il
aprel-may aylarında «Mehmet Akifdən Hüseyn Cavidə türk ziyalıları»
mövzusunda beynəlxalq konfransın təşkili ilə də bağlı razılıq əldə
olunub. Şərqşünaslıq İnstitutunun və Qafqaz Universitetinin rəhbərləri
birgə elmi tədbirlərin təşkili, elmi əsərlərin tərcüməsi və nəşri
sahəsində görüləcək işlərin də perspektivlərini müzakirə ediblər.
http://az.apa.az/xeber_AMEA-nin_Sherqshunasliq_Institutu_ve__277198.html