Türkiyədə 10-cu Beynəlxalq Türk dili Olimpiadası başlayıb. Olimpiadada 135 ölkədən 1500-ə yaxın şagird qatılıb.
“Azadinform” xəbər verir ki, “Çağ” Öyrətim Şirkəti və Qafqaz
Universitetinin təşkilatçılığı ilə Azərbaycandan bir qrup jurnalist
Türkiyədə keçirilən olimpiadanın gedişini izləyib. Olimpiada
çərçivəsində hər bir ölkənin tarixi, mədəniyyəti, qədim və görməli
yerləri və digər milli dəyərlərinin nümayişi üçün sərgi təşkil edilib.
Təkcə türk dilinin təbliğinə deyil, insanlar arasında sevgi, dostluq,
sülh və əminamanlığın yaranması, onların yaxın və mehriban şəraitdə
yaşamalarına xidmət edən olimpiada çərçivəsində təşkil edilən sərgidə
Azərbaycan ən böyük stendlə təmsil olunub. Sərgidə Azərbaycanın milli
mətbəxi, milli geyimləri nümayiş olunub, Azərbaycanın adət-ənənələri,
tarixi yerləri barədə ziyarətçilərə geniş məlumat verilib.
İstanbulda keçirilən tədbirdə “Çağ” Öyrətim Şirkətinin prezidenti
Ənvər Özərən bildirib ki, sərgidə tədbirdə yaradılan ən böyük stend
Azərbaycanla bağlı olub. Onun sözlərinə görə, sərgini gün ərzində 700
min nəfərə yaxın insan ziyarət edib. Burada Azərbaycanın qədim yerləri,
sənət əsərləri, görməli yerləri, dəyərləri nümayiş olunur.
Olimpiadanın əhəmiyyətindən bəhs edən Ə.Özərən bildirib ki, ənənəvi
keçirilən olimpiadalarda ən çox medal qazanan Azərbaycan şagirdləri
olub. Ə.Özərən olimpiada ilə bağlı keçirilən tədbirlərin Türkiyənin
digər 67 bölgəsində də təşkil edildiyini söyləyib. Bu il də olimpiadada
Azərbaycan şagirdlərinin qatıldığını diqqətə çatdıran Ə.Özərən qeyd edib
ki, olimpiadada məktəblilər Türkiyənin 25 bölgəsində türk dilində şeir
söyləyəcək, mahnı ifa edəcək və digər kateqoriyalar üzrə istedad və
bacarıqlarını nümayiş etdirəcəklər.
Ə.Özərən onu da açıqlayıb ki, dünyanın 150-dən artıq ölkəsində türk
məktəbləri fəaliyyət göstərir: “Amma sevindirici hal oldur ki, bu
məktəblərin ilk fəaliyyətinin xeyir-duasını ümummilli lider Heydər
Əliyev verib. Onun xeyir-duası ilə fəaliyyət göstərən bu məktəblərin
şagirdləri indi bayram əhvalını yaşayır”-deyən Ə.Özərən vurğulayıb ki,
məktəblərin digər ölkələrdəki fəaliyyəti Azərbaycan və Türkiyə diaspor
təşkilatlarının möhkəmlənməsinə xidmət edəcək.
Qeyd edək ki, olimpiada çərçivəsində həmçinin İstanbul Sərgi
Mərkəzində Azərbaycan gününə həsr olunan tədbir təşkil olunub. Tədbirdə
Türkiyə və Azərbaycanın dövlət və hökumət rəhbərləri, parlament üzvləri,
iş adamları, tanınmış alimlər, yazıçılar iştirak ediblər. Azərbaycan
gecəsində şagirdlərimiz şeir söyləyib, xalq və bəstəkar mahnıları,
muğamlar oxuyub və rəqs ediblər. Əllərində 300-ə yaxın Azərbaycan
bayrağı olan Azərbaycan və Türkiyə vətəndaşları şagirdlərimizin
ifalarında məmnun qalıb, onları ayaq üstə alqışlayıblar.
Xatırladaq ki, IX Beynəlxalq Türk Dili Olimpiadasında Azərbaycan
məktəbliləri 7 qızıl, 10 gümüş və 4 bürünc medal olmaqla, 21 medal
qazanıblar.
