Türk dili sevdalıları könülləri coşdurur
2003-cü ildə 17 ölkədən 62 məktəblinin
iştirakı ilə ilk müsabiqəsini keçirən Beynəlxalq Türk Dili Olimpiadası
builki, onuncu yarışın məşəlini 135 ölkədən gəlmiş 1500 məktəblinin
iştirakı ilə yandıraraq öz işinə başladı.
Türkiyənin məşhur şoumeni Bəyazid
Öztürkün apardığı olimpiadanın tamaşaçıları arasında Türkiyənin dövlət və
hökumət rəsmiləri, elm, mədəniyyət və media nümayəndələri, eləcə də qonşu
ölkələrdən gəlmiş yüksəkrütbəli məmurlar, elm, mədəniyyət xadimləri var.
Türkiyənin, eləcə də digər türkdilli
ölkələrin hər il fərəh və göz yaşları ilə izlədikləri Beynəlxalq Türk Dili
Olimpiadasının builki mərhələsi öz işinə başladı. “İnsanlıq əl-ələ, bayram o
bayram ola” devizi ilə öz işinə başlayan builki tədbirlərə dünyanın ən müxtəlif
irqlərini, din və dillərini təmsil edən, Braziliyadan Vyetnama, Pakistandan
Amerikaya qədər dünyanın dörd bir tərəfindən gəlmiş məktəblilər qatılıblar.
Onlar türk dili sevdalılarıdır. Hamısı da türkcə danışır, mahnı, şeir oxuyur.
Afrikadan gəlmiş qaradərili bir
məktəblinin Türkiyənin qüruru olan “İstiqlal” marşını oxuması dövlət
başçısından tutmuş, sıravi vətəndaşadək hər kəsin köksünü qabardır, gözlərinə
fərəh yaşı endirir.
Türkiyə dövləti, hökuməti və eləcə də iş
dünyası tərəfindən dəstəklənən, rəğbət görən bu tədbir haqqında təhsil naziri
Ömər Dinçər belə deyir: “2100-cü ildə dünyada işlək dilin sayı çox az olacaq.
Amma biz inanırıq ki, o az dillərin arasında bizim sevimli türkcəmiz də var.
Çünki məhz bu möhtəşəm tədbir sayəsində türk dili dünya dilləri arasında
sürətlə irəliləyərək yayılır, sevilir və rəğbət qazanır”.
Tədbirin açılış mərasimində Türkiyənin
dövlət və hökumət nümayəndələri, İstanbul rəhbərliyi, tanınmış elm, mədəniyyət
və media nümayəndələri iştirak ediblər.
Xatırladaq ki, Azərbaycan məktəbliləri
2003-cü ildə keçirilən ilk olimpiadadan bəri bütün yarışlarda uğurla iştirak
ediblər və dəfələrlə yarışın qalibi olaraq, ölkəmizə medallarla dönüblər.