Məzunlarımızın İstanbul gəzisi təəssüratları
İstanbulda keçirilən Beynəlxalq Türk dili
olimpiadasına qatılan məzunlarımızdan Ərəb dili və ədəbiyyatı məzunu
Rəşad Baxışovun təəssüratlarını sizinlə bölüşmək istəyirik (şəkildə
solda - Rəşad Baxışov):
Hələ orta məktəbdə ədəbiyyat dərsində Mahmud Kaşğarinin “Divani lüğət
it-Türk” əsərini keçəndə belə bir cümlə xüsusilə yadımda qalmışdı.
Deyilirdi ki, əsər peyğəmbərimizin “Türk dilini öyrənin, çünki onların
uzun sürən hakimiyyəti olacaqdır” hədisi ilə başlayır. Yadımda qalsa da o
vaxt bu məsələ mənim üçün bir o qədər də ciddi görünməmişdi. Əksəriyyət
hesab edirdi ki, burada Osmanlı dövrü nəzərdə tutulub və artıq vaxtı
keçib.
Bugün isə fərqli insanların (rəngindən, irqindən asılı olmayaraq
malaziyalı, ingilis, ukraynalı və s. yüzlərlə gəncin) Türk dilində
danışıb anlaşmasının şahidi olanda düşünürəm ki, bəlkə də hələ vaxtı
çatmayıb.
İstanbulda təşkil olunan Beynəlxalq Türkçə Olimpiyadalarına bu il 135
ölkədən 1500 iştirakçı gəlmişdi. İzdihama qarışaraq o coşğunu canlı
yaşamaq sözlərlə ifadə olunmayacaq bir başqa duyğu idi. Bundan başqa
Azərbaycandan olan iştirakçıların aktivliyi, Azərbaycan mədəniyyətinin
geniş şəkildə tanıdılması, milliyyətindən asılı olmayaraq əksəriyyətin
əlində Azərbaycan bayraqlarını görmək olduqca qürurverici idi.
Fotolardan, videolardan çox görüb izləmişdim. Orda olmağım bir başqa
idi. Buna görə Universitetimizin Məzun Kordinasiya şöbəsinə, xüsusilə
İsmayıl Murguzov və Anar Məmişova xüsusi təşəkkürlər.